Аталған баспасөз мәслихатына Ауыл шаруашылығы министрлігінің Ветеринарлық бақылау және қадағалау комитеті төрағасының орынбасары Олжас Аусабаев, Агроөнеркәсіптік кешендегі мемлекеттік инспекция комитетінің төрағасы Ержан Айнабеков және ІІМ Әкімшілік полиция комитетінің жол қозғалысын қамтамасыз ету саласын үйлестіру бөлімінің басшысы Ғани Исабаев қатысты.
Жиында вице-министр Г.Исаева биылдан бастап экспорттық саясат әлеуеті нарықтарға АӨК өнімдерін мақсатты ілгерілету негізінде құрылатынын атап өтті. Сонымен қатар, «Азық-түлік келісімшарт» АҚ-тың меншікті қаражаты негізінде АӨК-тің экспорттық орталығы құрылатынын жеткізді. Бұл ретте, қазақстандық өнімдердің экспорттық әлеуетін ілгерілету үшін басқа елдермен келіссөздер жүргізуге халықаралық ұйым мәртебесін иелену маңызды болып отыр.
Аталған экспорттық орталық «KazakhExport» және «KazakhInvest» акционерлік қоғамдарымен, сондай-ақ, Қазақстандағы шетел дипломатиялық өкілдері арқылы тығыз ынтымақтастықта әрекет ететін болады. Орталық сыртқы нарықтарға талдау жүргізіп, дамыған елдер үшін өнімдерді жылжытудың жол картасын құру, өнімдерді экспорттау саласында кеңестер беріп, келісімшарттар жасасу және ауылшаруашылық тауар өндірушілерінен өнімді «форвардтық» тәсілмен сатып алу жұмыстарымен айналыспақ. Сонымен қатар, орталық ауылшаруашылық өнімдерін сақтандыруды қамтамасыз ете отырып, негізгі брендтерді, соның ішінде «KZ Organic Food» брендін алға жылжытпақ.
Қазіргі уақытта Қытай, Иран, БАӘ, Израиль, Сауд Арабиясы және т.б. елдерге экспортталатын тауарлардың көлемін арттыру бойынша жұмыстар жүргізіліп жатыр. Бұл елдермен ауылшаруашылық өнімдеріне қойылатын фитосанитарлық және ветеринарлық талаптар келісілуде, тасымалдану бажын төмендету жөнінде келіссөздер жүргізілуде. Мысалы, ҚХР төр-
ағасы Си Цзиньпиннің Қазақстанға ресми сапары кезінде Қазақстаннан Қытайға тасымалданатын мұздатылған қой етіне қойылатын талаптардың хаттамасына қол қойылды.
Сондай-ақ, Қазақстаннан Қытайға және БАӘ-ге тасымалданатын мұздатылған қой етінің ветеринарлық сертификатына қол қою жұмыстары жүргізілуде екен. Ал Иранға экспортталатын қой, мұздатылған және салқындатылған қой етін тасымалдау бойынша ветеринарлық талаптар келісілген. Ал Израильге қой тасымалдау бойынша осы елдің құзыретті мекемесіне хат жолданыпты. Сонымен қатар, 2017 жылғы 25 мамырда Халықаралық эпизоотикалық бюроға мүше елдердің Бас ассамблеясының 85-сессиясында еліміздің 5 аймағы – Алматы, Шығыс Қазақстан, Жамбыл, Қызылорда және Оңтүстік Қазақстан облыстары аусылдан вак-
цинацияланған таза аймақ мәртебесін алды. Бұдан бөлек, Қазақстанның 9 аймағы 2015 жылы аусылдан таза аймақ және аусылды бақылау жөніндегі ұлттық бағдарлама негізінде жылқылардың африкалық оба ауруынан босатылу жөніндегі мәртебесін алған болатын. Осылайша, Қазақстанның барлық аумағы аусылдан босатылған аймақ мәртебесіне ие. Бұл елімізге Дүниежүзілік сауда ұйымына мүше елдерге мал және өсімдік шаруашылығы өнімдерін экспорттауға, агроөнеркәсіптік кешеннің экспорттық әлеуетін жоғарылатуға және Қазақстанның экономикалық тұрғыдан дамуына оң әсерін тигізеді.
Ал Қытай Халық Республикасына тасымалданатын өсімдік шаруашылығы өнімдеріне ешқандай шектеу жоқ. Нақты бір тасымалданатын өнім түрлеріне фитосанитарлық талаптарды анықтау үшін министрлік арнайы жұмыстар жүргізуде. Сондай-ақ, бидайдың, соя бұршағы мен бидай кебегі партияларын экспорттау жөнінде хаттамаға қол қойылған. Жуырда жоңышқа мен өсімдік шаруашылығы өнімдерінің 31 түрін тасымалдау бойынша хаттамаға қол қойылады деп күтілуде.
Қолға алынған шаралардың бәрі еліміздің агроөнеркәсіптік кешенін дамытудың 2017-2021 жылдарға арналған мемлекеттік бағдарламасының негізінде іске асырылып жатыр. Бұл отандық ауылшаруашылық тауар өндірушілеріне жаңа мүмкіндіктер ашпақ.
Динара БІТІК,
«Егемен Қазақстан»
