Екі жақты келіссөз Қазақстан мен Румыния дипломатиялық қарым-қатынасының орнауына 25 жыл толуына орай өткізілді. Мерейтойлық кездесуден кейін министрлер бұқаралық ақпарат құралдары өкілдеріне мәлімдеме жасады.
«Біз ынтымақтастықтың екі жақты және көп жақты мәселелерін талқылап, сауда-экономика және инвестиция салаларындағы өзара әрекеттестіктің көкжиектерін белгіледік. Екі елдің әлеуеті жететін транзиттік-көліктік қатынасты тиімді пайдалануға қатысты ынтымақтасу мәселелерін қарадық. Бүгінгі таңда энергетика саласындағы ынтымақтастық сауда және экономикалық байланысымыздың басым бағыты болып саналады. Алайда, соған қарамастан сауда салаларын кеңейту біздің басты міндетіміз», – деді Қайрат Әбдірахманов.
Министрдің пікірінше, Қазақстан тарапы елді жандандыруға арналған жобаларға румын бизнес өкілдерінің қатысқанына мүдделі көрінеді. Сонымен қатар, ол екі ел арасындағы мәдени және ғылыми сабақтастықты дамыту үшін шәкірт алмастыру бойынша оқитын студенттер санын ұлғайту, академиялық сала мамандарының жиынын өткізу секілді шаралар қолға алынатынын жеткізді.
Өз кезегінде Теодор-Виорел Мелешкан Қазақстанды Румынияның Орта Азиядағы теңдессіз серіктесі деп есептейтінін жеткізді.
«Менің іс-сапарым нақты нәтижелер әкелгеніне қуаныштымын. Біз дипломатиялық қарым-қатынастың орнауына 25 жыл толуына орай Румыния сауда палатасы мен «Атамекен» ұлттық кәсіпкерлер палатасының әріптестігі туралы келісімге қол қойдық», – деді Румыния Сыртқы істер министрі Теодор-Виорел Мелешкан.
Ортақ келісімге қол қойылғаннан кейін Балқан түбегінен келген меймандар мен Қазақстан тарапы ЭКСПО-2017 халықаралық көрме аясында өтіп жатқан Румыния күндерін тамашалады.
Абай АСАНКЕЛДІҰЛЫ,
«Егемен Қазақстан»
