Оңтүстік Американың қақ ортасында орналасқан бұл мемлекет тікелей теңізге шыға алмайды. Алайда ел аумағынан өтетін Парана өзенін өз пайдасына ұтымды пайдалануда. Мұнда әлемде үлкендігі жағынан екінші орында тұрған Итайпу су электр стансасы орналасқан. Оның өндірістік қуаты – 14 мың мегаватт. Оған қоса Якирета және Акарай су электр стансалары бар. Осының арқасында Парагвай энергияның 99,6 пайызын жаңғырмалы қуат көздерінен алады.
Салтанатты рәсімге арнайы келген мәртебелі меймандар сөз алып, көрменің мән-маңызына тоқталды. «Қазақстан тарапына халықаралық маңызды шараға бізді шақырғаны үшін алғыс айтамын. Көрменің тақырыбы да ұтымды таңдалған. Бүгінгі таңда жасыл энергияға көшу жаһан үшін және халықаралық қауымдастық үшін өзекті мәселенің бірі. Ал біздің еліміз әлемде баламалы қуат көзін өндіру және экспорттау бойынша көш басындағылардың қатарында. Өткен жылдың соңында Бразилиямен арадағы Итайпу су электр стансасы сағатына 100 млн мегаватт қуат өндіргенін мақтанышпен айтамын. Бұл – әлемдік рекорд», деді Парагвайдың сыртқы істер министрінің орынбасары Оскар Кабельо Сарубби.
