Алып шаһар Алматының түбінде тұрып, ел көрген көгілдір отынның қызығын көрмеген бірден-бір аймақ – жыр алыбы Жамбыл атындағы аудан болатын. Аудан орталығы Ұзынағашқа газ келген қуанышты ол сәттер «күні кешеге» айналды. Бұл игілікті істің басында «Тәуекел газ құбыры» компаниясы тұрды. Ауыл және аудан жұртшылығына ғана емес, күллі облыс аумағына аты жайылған сол мекеменің кеңсесінде рухани танымдық кездесу өтті. Қазақстан Республикасының Президенті Нұрсұлтан Назарбаевтың «Егемен Қазақстан» газетінде жарияланған «Болашаққа бағдар: рухани жаңғыру» мақаласының аясында өткен шараға байланысты ұжымға есімдері елге танымал азаматтар ат басын арнайы бұрып келді. Қазақтан шыққан тұңғыш Олимпиада чемпионы Жақсылық Үшкемпіров жүздесудің маңызын шынайы тілмен былай түсіндірді.
– Елбасы мақаласында «Прагматизм – өзіңнің ұлттық және жеке байлығыңды нақты білу, оны үнемді пайдаланып, соған сәйкес болашағыңды жоспарлап алу, ысырапшылдық пен астамшылдыққа, даңғойлық пен кердеңдікке жол бермеу деген сөз» деп атап көрсетті емес пе? «Тәуекел газ құбыры» мекемесінің басшысы Данияр Нұрбаевты көптен танитындықтан да мен оны Президентіміз жоғарыда айтқандай, бүгінгі жаңа қоғамның болашаққа нық сеніммен қадам жасаған азаматы деп білемін. Біздің бұл кездесуіміздің түпкі мәні де осынау атпал азаматтың абыройын асқақтату, мерейін өсіру. Еліміздің еңсесін көтеруге үлес қосқан Данияр Молдиярұлындай саналы азаматтарымыз лайым көп болғай, – деген бүгінгі белгілі кәсіпкер Молдияр Нұрбаевты «Қазақстанның 100 жаңа есімі» қатарына қосуға лайық азамат деп ой түйіндеді. Айтпақшы, атақты спортшының өзі де осы ауданда ауыл шаруашылығы саласында кәсіпкерлікпен айналысады.
– Жақсылық ағамның сөзін сабақтайын, – деген жазу-
шы-кәсіпкер, Жамбыл ауданының құрметті азаматы Манарбек Ізбасар былай деді: – Аз ғана уақыт ішінде аудан халқын көгілдір отынмен қамтамасыз еткен Данияр Нұрбаевты қазіргі заманымыздың қаһарманы деп айтамыз. Мұның сыртында ол аудан бойынша әлеуметтік қолдауды қажет ететін 400 отбасына газ құбырын тегін жүргізіп, ошақтарына от берді. Бұған қалай жаның сүйсінбейді? Қос кәсіпкердің сөзін облыстың құрметті азаматы, белгілі қаламгер Күмісжан Байжан қызу қостап, Жамбылдан бата алған жыршы-термеші Өмірзақ Қарғабаевтың ұлы Өміртай ақын жырдан шашу шашты.
Өнер адамдарының тоқайласып елі үшін еңбек еткен азаматқа ерекше мадақ білдіруі тектен тек емес. Өйткені, бизнесмен Данияр Нұрбаев аудан өмірінде өтіп жататын қандай да бір мәдени-әдеби іс-шараларға қатысудан, оған қолдау көрсетуден ешуақытта тыс қалған емес. Оның бір мысалы, кәсіпкер жігіт атақты Сүйінбай ақынның кесенесі жанынан ақынға тағзым етіп келушілер үшін аяқ суытып, тыныстайтын жайлы ғимарат салып берді. Тізбелесе Ұзынағаштың бүгінгі Атымтай жомартының ауыз толтырып айтатындай атқарған игі істері шаш етектен екені байқалады. Өз кезегінде сөз алған «Тәуекел газ құбыры» ЖШС басшысы Данияр Нұрбаев ұжымының атынан ел ағаларына – мекеменің бүгінгі құрметті қонақтарына ілтипаты үшін алғыс айтты. Халық үшін, елдің болашағы үшін ұлттық мұраттар мен Қазақстанды барлық салада алға жылжытуға шамшырақ болатын басты бағдарға сай болашақта да еңбектерін еселей беретіндіктеріне сендірді.
Басты бағдарламада атап көрсетілгендей қоғамдық сананы тек саяси және экономикалық тұрғыдан ғана емес, рухани жағынан да жаңғыру қажет екені осынау жылы жүздесуде ерекше көрініс тапты.
Талғат СҮЙІНБАЙ,
«Егемен Қазақстан»
АЛМАТЫ
Суретті түсірген Нұрманбет ҚИЗАТҰЛЫ
