Мемлекет басшысы Нұрсұлтан Назарбаев «Болашаққа бағдар: рухани жаңғыру» атты бағдарламалық мақаласында білімге ерекше маңыз берген-ді. Кәсіби білімді дамыту міне, осы талапқа жауап берумен қатар, жастардың бұл өмірдегі өз орындарын табуына қолғабыс та болады. Бұл ретте Көкшетау қаласында адамдардың өмірін сақтап қала алатын мамандарды даярлайтын екі бірдей нысанның қолданысқа берілуі шынымен де қуанышты жайт. Мұнда дайындалатындар төтенше жағдайда не істеулері керектігін жақсы меңгерумен қатар, қорқынышты жеңудің де хас шеберлері бола алады. Мұндай машықты енді олар өрт-құтқарушыларды даярлайтын манеж бен әскери жекпе-жек өнерін зерттейтін ғылыми-зерттеу орталығы және қолданбалы зертхана арқылы жүзеге асыратын болады.
Аталған кешен Көпсалалы азаматтық қорғаныс колледжінде орналасқан. Оқу орнының басшысы Шоқан Қасымның сөзіне қарағанда, мекеме базасында 2009 жылдан «Өрт қауіпсіздігі» және «Төтенше жағдайларда қорғау» салалық мамандықтар ашылған. Осылайша мамандардың машықтарын ұштап, кәсіби даярлығын барынша арттыру-
ға жағдай жасалғанын ерекше атап кеткен жөн.
Өрт-құтқару манежінің қолданысқа берілуімен енді жаттығуларды күн демей, түн демей, тіпті, жылдың барлық мезгілінде жүргізе беруге мүмкіндік туып отыр. Төрт қабатты өрт сөндіру мұнарасында студенттер өздерінің болашақ құтқарушылар ретіндегі машығы мен ептілігін, тіпті төзімділігін барынша шыңдайтын болады. Сондай-ақ, аталған оқу орны Халықаралық азаматтық қорғаныс ұйымымен байланысты екенін ескерсек, енді колледждің спорттық манеж базасында халықаралық шараларды өткізуге де мүмкіндік бар.
Ал әскери жекпе-жек өнерін зерттейтін ғылыми-зерттеу орталығының ашылуы спортшылардың әскери жекпе-жек өнерінің философиясын, биомеханикасын және физиологиясын терең ұғынуға мүмкіндік береді. Сонымен бірге, даярлық барысы жаттығуда жарақат алып қалуға, сондай-ақ, адамдардың денсаулығына нұқсан келтіріп алудан қорғауға септесетін болады. ҒЗО жанындағы Қолданбалы зертхана «Дене шынықтыру және спорт» мамандығы бойынша оқытылып жатқандардың әлеуетін арттыруға өзіндік үлесін қосатыны түсінікті де.
Бұған қоса, колледж ауласында заманауи өрт және апатты-құтқару техникаларымен жабдықталған апатты-құтқару бөлімі депосының ғимараты да салынған.
Асқар ТҰРАПБАЙҰЛЫ,
«Егемен Қазақстан»
Ақмола облысы