Ортақ көзқарас танытылды

Бүгін Астанада Мемлекет басшысы Нұрсұлтан Назар­баев­тың, Мемлекеттік хатшы Қанат Саудабаевтың және Сыртқы істер министрі Ержан Қазыхановтың қатысуымен Астанадағы Тәуелсіздік сарайында Ядросыз әлем халықаралық форумы басталады. Осыған орай кеше еліміз Сыртқы істер министрі бірқатар шетелдік делегация өкілдерімен кездесті. Жалпы, аталған форумға 200-ге тарта қонақ шақырылса, олар­дың ішінде Қазақстанда тіркелген дипломатиялық корпус, қару­сыздану және таратпау сала­сын­дағы халықаралық және отандық ҮЕҰ, сарапшылық қауымдас­ты­ғы, академиялық топ, әлем елдері парламенттері мен үкіметтерінің халықаралық саясаттағы белді ардагерлері, негізгі ядролық қа­русыздану саласында өзін таны­тып келе жатқан елдердің саяси тұлғалары мен халықаралық ұй­ымдардың өкілдері бар. Солардың бірі Оңтүстік Африка Республикасының бұрынғы президенті, Нобель сыйлығының лауреаты Фредерик де Клерк еліміз сыртқы саясат ведом­ство­сы­ның басшысымен жарты сағаттан астам сөйлесті. Ол бұқаралық ақ­парат құралдары өкілдеріне берген брифингте ОАР-дың Қазақ­стан сияқты ядролық қарудан бас тартқан ел екендігін айта келіп, бұл оның президент болып тұр­ған кезінде жүзеге асырыл­ған­ды­ғын көлденең тартты. Қазақ­стан­да өтетін форум маңызды болып саналады, сондықтан алқалы отырыс соңынан арнайы құжат қабылдануы тиіс, деді Нобель лауреаты. Жапониядағы Фукусима-1 атом электр стансасындағы жарылысқа қатысты ойын білдірген Фредерик де Клерк оның ядролық қаруға қарсыларға үлкен күш бергендігін жеткізді. Жа­һан­дық ауа райының жылынуы жағ­дайында ядролық қаруды пайда­лануды дұрыс санамайтындығын ортаға салған ол ядролық отынды бейбіт мақсатқа пайдалануға қарсы емес екендігін атады. Сондай-ақ кеше Сыртқы істер министрі Ержан Қазыхановтың Еуропа Кеңесінің Бас хатшысы Тур­бьорн Ягландпен кездесуі болды. Қазақстан – заңдардың үс­темдігі мен адам құқының де­мократиялық стандарттар мен принциптеріне негізделген, тиімді басқаруды жылжытуға қатыс­ты жартылай келісімдер мен бір­қатар құқықтық құжаттарға қа­тыса отырып, Еуропа Кеңесімен байланыстарды тереңдетуге мүд­делілік танытып келе жатқан ел. Сондықтан да қазақстандық министр Т.Ягландқа еліміздің Венеция комиссиясына толыққанды мүшелігіне тапсырысты табыста­ды. Осы ретте Демократияға құ­қық арқылы еуропалық комис­сия­сы немесе қала атымен ата­лып кеткен Венеция комиссиясы Еуропа Кеңесіне 18 мүше мем­лекеттің жартылай келісімі бой­ынша 1990 жылы құрыл­ған­ды­ғын айта кету керек. Ал 2002 жыл­дың ақпанында комиссия кеңейтілген келісімге айналып, оған еуропалық емес мемлекеттер де кіре бастады. Сыртқы істер министрі Ержан Қазыханов пен Еуропа Кеңесінің Бас хатшысы Турбьорн Ягланд бірлескен мәлімдеме жасады. Сыртқы істер министрі мен Бас хатшы Қазақстанның конвен­ция­ларға қосылуын қамтамасыз ету мақсатында ынтымақтастық­ты жандандыруға дайын екендерін білдірді. Парламенттік ынты­мақтастық маңызды сала болып табылады. Сыбайлас жемқорлық­қа қарсы күрес, балалар құқық­тарын қорғау, мәдени ынты­мақ­тастыққа, этносаралық және мәдениетаралық үнқатысуға ерек­ше көңіл бөлінген. Сондай-ақ, тараптар Қазақстанның Еуропа Кеңесінің тиісті жекелеген келісімдеріне қосылуының тиімділігіне ерекше ден қойды. Қазақ­станның білім, мәдениет, жастар және спорт салаларындағы еуро­палық мәдени конвенцияға қаты­суына негізделген ынтымақ­тас­тық үшін әлеуетті зерделеуге келісім берілді. Бұл бағыттағы ынтымақтастық сәтті бастамаға ие және екі тарап та оның ілгерілеуіне үміт артады. Асқар ТҰРАПБАЙҰЛЫ.