![Шетел азаматы Қазақстаннан зейнетақы алып келген](/article_photo/1501737439_article_b.jpeg)
Солтүстік Қазақстан облыстық прокуратурасы жартыжылдық жұмыс қорытындыларын шығарып, бірқатар кемшілікті анықтады.
Мәселен, ауылшаруашылық жерлерін тиімді пайдаланбайтындар әлі көп. 11 мың гектар аумақты арамшөп басып кеткен. Бұл мақсат үшін алынған субсидияның қайда жұмсалғаны белгісіз.
Өткен жылға қарағанда биыл қылмыстық фактілердің 29,8 пайызға төмендегені байқалады. Солтүстік Қазақстан облыстық прокуратурасы 1-ші басқармасының бастығы Асхат Ауқатовтың айтуынша, облыста қылмыс пен құқық бұзушылықтардың алдын алуға бағытталған бірлескен жобалар сәтті жүзеге асып келеді. «Бәріне жұмыс» жобасы бойынша 80 мүгедек жұмысқа орналасып, 20-ға жуығы оқуға жіберілген.
Есеп беру барысында зейнетақы төлемінде орын алған сорақы жайттар да сөз болды.
– Осыдан 10 жыл бұрын Германияға көшіп, сол елдің азаматтығын алған солтүстікқазақстандық 2 жыл бойы Қазақстаннан да зейнетақы алып отырған. Сөйтіп, ел қазынасына 3,5 миллион теңге көлемінде шығын келтірген. Қазіргі таңда бұл іске байланысты сотқа дейінгі тергеу амалдары жүргізілуде. Қалай болғанда да аталған сома мемлекет бюджетіне қайтарылуы қажет, – деді алқалы жиында 4-ші басқарманың бастығы Жанкелді Базарбаев.
Өмір ЕСҚАЛИ,
«Егемен Қазақстан»
Солтүстік Қазақстан облысы