Осыған орай бей-берекетсіз салынған нысандарды басқа жаққа көшіруге шешім қабылданған. Тізімге «Даниял» дәмханасы да ілігіп, оны бұзу кезінде құрылысшылар патша зеңбірегін кезіктірген. Өлкетанушылардың айтуларынша, зеңбірек бұрын осы жердегі дөң үстіне орнатылып, балалар қызықтайтын орынға айналған. Тарихы әріден басталатын көне артефакт қилы-қилы кезеңді бастан өткерген тәрізді. Өйткені, 2000 жылдары үшті-күйлі жоғалып кетіп, тұрғындар оны «қолды болдыға» жорып жүрген.
– Кейін дөң үстіне дәмхана тұрғызылып, астында қала берсе керек. Нысан заңсыз бой көтерді ме, әлде иелері басқа жаққа ауыстыруды қиынсынды ма − айту қиын. Жобалауымызша Петропавл қамалы салынған 1752 жылдары әкелінгенге ұқсайды. Біз өз тарапымыздан оны мұражайға ыңғайлы орналастыру жолдарын ойластырудамыз, – деді телефон арқылы хабарласқанымызда мәдениет және құжаттамалар басқармасы басшысының міндетін атқарушы Зәуре Нұрмұқанова.
Петропавлдықтар көзден бұл-бұл ұшқан ескіліктің көне жәдігерімен қайта табысқандарына қуанулы. Қазір жергілікті мұражайда екі зеңбірек тұр. Бұл үшінші экспонат ретінде қосылады.
Өмір ЕСҚАЛИ,
«Егемен Қазақстан»
Солтүстік Қазақстан облысы
