Жиынға қатысушылар «Болашақтың энергиясы: әйелдер, бизнес және жаһандық экономика» тақырыбын талқылауда. Шара барысында көпшілік ЭКСПО көрмелерінде «EXPO Women» форумын құруды ұсынды.
«EXPO Women» төралқасының төрайымы, Президент жанындағы «Жасыл экономикаға» көшу кеңесінің мүшесі Салтанат Рақымбекованың айтуынша, әйелдерге жасыл технология саласындағы шараларды ұйымдастыру қажет. «Біз қоршаған ортаны қорғау мәселесінде әйелдер әлеуетінің жетістігін көрсетіп отырмыз. Ол дегеніміз – климаттың өзгеруімен күрес, жасыл экономикаға көшу, сондай-ақ, 2015 жылы қабылданған тұрақты дамудың 17 мақсаты. 2000 жылы өткен мақсаттардың қорытындысы кезінде біздің ел үздік көрсеткішке ие болды. Енді ЭКСПО-2017 көрмесін өткізген соң, 17 мақсатқа қол жеткізу бойынша барлығымыз бірігіп елімізге рейтингтің жоғары сатысынан орын алуға көмектесеміз», дейді ол.
«EXPO Women» ұйымының өкілдері айтып өткендей, үшінші халықаралық әйелдер форумы Дубайда ұйымдастырылмақ.
Шара шеңберінде Назарбаев орталығында «Әлемді өзгерткен әйелдер» фотокөрмесі өтті. Сонымен қатар «Coca Cola» белестері» республикалық байқауының жеңімпаздары марапатталды.
Асхат РАЙҚҰЛ
"Егемен Қазақстан",
Суретті түсірген
Орынбай Балмұрат,
«Егемен Қазақстан»
