– Қазір аудан орталығында бір мың адам үй алу кезегінде тұр. Елбасының сарабдал саясатымен қабылданған «Нұрлы жол», «Нұрлы жер», басқа да бағдарламалар ең алдымен қарапайым халықтың әлеуметтік мәселелерін шешуге арналғаны белгілі. Тағы бір 60 пәтерлі бес қабатты үйдің құрылысын салу жөніндегі құжаттар бойынша жұмыстар атқарылып жатыр. Бородино ауылында да екі пәтерлі бес үйдің құрылысы басталды. Екі құрылыспен де танысасыздар, – деді аудан әкімі Нұржан Тоқсейітов.
60 пәтерлі үйдің құрылысы маусымда басталды. Материалдардың барлығы осы өңірден. Кірпішті Өскеменнен, цементті іргедегі Бұқтырмадан алуда. Демек, материалдар бағасы қолжетімді. Мұнда 40 пәтер – екі, 20 пәтер үш бөлмелі. Келесі жылдың соңына таман ғимарат пайдалануға берілмек.
Салынып жатқан ғимарат қаланың 10-шы шағын ауданына қарайды. Сондықтан болса керек, бұл жерде нысандарды сумен, жылумен қамтамасыз ететін құбырды «Алтынстройпроект» серіктестігі салып жатыр. Маңызды құрылыстың құны 618 миллион теңге, өткен жылдың қарашасында құрылысы басталған кешен келер жылдың қыркүйегінде іске қосылуы тиіс. Аудандық архитектура және құрылыс бөлімінің басшысы Е.Қанапиев қаланың өркендеуіне ықпал ететін ұзындығы 6,3 шақырым құбырдың сапалы салынатынына кәміл сенеді. Ал аудандық жылу қазандығының құрылысына «Нұрлы жер» бағдарламасы бойынша 1 миллиард 433,1 миллион теңге бөлініп, нысан жыл соңында пайдалануға берілмек.
Аудан басшылығы өңірдің әлеуеті артуы үшін күш салуда. Соның бір дәлелі, «Нұрлы жер» бағдарламасы бойынша Ломоносов және Шахтақұрылыс көшелеріне асфальт төсеу үшін қыруар қаржы көзін тауыпты. Жаңа бағдарламаның берері көп, ең алдымен жылдар бойы үй алу кезегінде тұрған азаматтардың проблемасын шешеді. Оның үстіне жекеменшік үй салуға тілек білдіргендердің өтініші қабылданып жатыр. Қалай дегенде де, өндірісі өркендеген кеншілер қаласының келбеті көз тартады. Еліміздегі жаңа бағдарламалардан қарапайым халық үміт күтеді. «Үй болса, күй болады» деген мақалдың өміршеңдігі соған дәлел болса керек.
Оңдасын ЕЛУБАЙ,
журналист
Шығыс Қазақстан облысы,
Зырян ауданы
Суретті түсірген автор
