«Стадион Войска Польского» аренасында өткен «Легия» мен «Астана» арасындағы матч Польшаның мемлекеттік мерекесі – Варшава көтерілісінің ұлттық күнін бір минут үнсіздікпен еске алу рәсімімен басталды.
Жалпы, кездесудің бірінші таймы «Астана» футболшысы Иван Маевскийдің қарсыласпен тартыста майып бола жаздаған сәтімен есте қалды. Әйтпесе, екі команда тарапынан қорғаушылардың екі аяғын бір етікке тыққан адуынды шабуылдар, қақпашылардың зәре-құтын алған жойқын соққылар байқала қоймады. Содан да болар, ойынның бұл бөлігінде қақпа құлпы бұзылмай, командалар үзіліске тең нәтижемен тарқасты.
Кездесудің екінші таймы біз күткендегідей алаң иелерінің шабуылымен басталды. Обалы нешік, жерлестеріміз қорғаныста аса сақ ойнап, қарсыластың «жаман» ойын жүзеге асырмаудың барлық амал-әрекетін жасап бақты. Дегенмен, «Аңдыған жау алмай қоймайды» деген бар, матчтың 76-минутында біздің Мокин қорғаған қақпа торында ала доп тулап жатты. Себастьян Шиманьскидің бұрыштамадан әуелете берген добын Якуб Червиньски деген жартылай қорғаушы баспен ұрып, қақпаның бос бұрышына дәл бағыттады.
Сөйтіп, «Астана» футболшылары Еуропада әйгілі клубтардың өзіне азу көрсетіп жүрген «Легия» сынды командадан екі ойын қорытындысында 3:2 есебімен айласын асырып, Чемпиондар лигасының плей-офф кезеңіне шықты.
Қазақстандық барша жанкүйерге қуаныш сыйлаған бұл ойында «Астана» мына құрамда өнер көрсетті: Мокин, Шитов, Аничич (Постников 63), Кляйнхайслер, Мужиков (Граховац 84), Маевский, Твумаси, Логвиненко, Кабананга, Мұртазаев (Бейсебеков 57), Шомко. Осы ретте, көтеріңкі көңіл-күйге кірбің түсірер бір жайтты айтпай кетуге тағы болмайды. Кәрі құрлықтың төрінде Қазақ футболының жақсы атын шығарып жүрген ұжымның құрамында бұл ойында екі ғана қаракөз өнер көрсетті. Оның өзінде, біреуі 84-минутта ойынды тәмамдаса, екіншісі 57-минутта ойыншы алмастырып, алаңға шықты...
Чемпиондар лигасының плей-офф кезеңіне сайдың тасындай іріктелген кіл мықтылар жолдама алды. Демек, тартыстың көкесі алда. «Астанаға» бөрікті аспанға атуға әлі ерте.
Қайрат ӘБІЛДИН,
«Егемен Қазақстан»
