Бүгін Астанаға ат басын тіреген боксшыны елордалықтар әуежайда қарсы алды.
Боксшыны қарсы алуға журналистер мен қала тұрғындары барды. Кездесу барысында Қанат алдағы жекпе-жек жайындағы және өзге де сауалдарға жауап берді.
Естеріңізде болса, маусым айында Астанада өткен баспасөз мәслиxатында Қанат Ислам келесі жекпе-жегін америкалық боксшы Джеймс Кирклендке қарсы өткізуді жоспарлап отырғанын айтқан болатын. Кейін канадалық Брэндон Кукпен жұдырықтасатыны белгілі болды. Осыған орай қойылған сұраққа Қанат: «Біз оның барлық талаптарын орындайтынымызды айтсақ та Киркленд келісімін бермеді. Тіпті сол беті телефонын да көтермейді. Менеджері де, промоутері де хабарсыз кетті. Мүмкін, алдағы уақыттарда жұдырықтасармыз», - деді.
Алдағы айқасқа елордада дайындалуының бір себебі Астананың ауа райына бейімделу екенін де айта кеткен Қанат, «мұндағы жаттығуымызда тек қана спарингтер өткізетін боламыз» - деп дайындық қыр-сырымен де бөлісті.
Жанкүйерлер асыға күткен 9 қыркүйек бокс кешінде Жанқош Тұраров (21-0, 15КО), Жәнібек Әлімханұлы (1-0, 1КО), Мейірім Нұрсұлтанов (3-0, 2КО), Руслан Мырсатаев (3-0, 3КО), Әли Ахмедов (7-0,5КО), Айдос Ербосынұлы (6-0, 6КО), Димаш Ниязов (11-0-3, 5КО) және Нұрсұлтан Жаңабаев (2-0, 1КО) сынды жеңіліп көрмеген жұдырықшылар рингке шығатынын көзқарақты жұрт білсе керек.
Бүгін Қанат Исламмен бірге алдағы жекпе-жектің андеркардында жұдырықтасатын қазақстандық боксшы Нұрсұлтан Жаңабаев та келді.
Былғары қолғап шеберлерін Нельсон Лопес бастап келді.
