Әрине, әлемдік деңгейдегі шараның басы-қасында жүретін жастардың мойнында үлкен жауапкершілік бар. Ерікті атану үшін қойылатын талаптар да жоғары. 18 жасқа толған азамат қазақ, орыс, ағылшын және өзге шет тілдерін білуі керек. Бірақ, ең бастысы, көрмеге үлес қосуға ыстық ықылас таныту.
Ерікті атқарған жұмысы үшін материалдық пайда таппайтыны белгілі. Дегенмен, елімізде түрлі шараларға қатысып, тегін жұмыс істейтіндердің қатары көбейіп келеді.
Мен Оңтүстік Қазақстан облысы, Мақтарал ауданының тумасымын. Астана қаласында өтіп жатқан ЭКСПО-2017 халықаралық мамандандырылған көрмесінің еріктісімін, яғни волонтермін. Менің жасым 25-те. Тілдерді оқыту және дамыту орталығында ағылшын тілі мұғалімі болып жұмыс істеймін.
Мен үшін ерікті болу дегеніміз – жақыныңа жәрдемдесу, еліміздің дамуына титтей де болсын үлес қосу. «Оң қолың бергенді сол қолың көрмесін», – дейді ғой қазақта. Қолыңнан келіп тұрған істі жасау біз сияқты жастар үшін түк қиын емес. Жаңадан дос-жаран, пікірлес, сұхбаттас адамдарды табуың өз алдына. Мерекелік шараларда елімізге танымал тұлғалармен тілдесуге мүмкіндік бар. Мен үшін бас қаламыздың күннен-күнге көркеюіне куәгер болудың өзі бақыт.
ЭКСПО-2017 халықаралық көрмесі тарихта қалатындай өткізілсе деген арманым бар. Шетелдік меймандар елімізді жақсы жағынан біліп қайтса деймін. Ал біз сеніп тапсырылатын шаруаларды тиянақты орындауды міндет санаймыз.
Басты міндетіміз – жәрдемдесу.
Нұрсәуле ТЕМІРОВА,
Тілдерді оқыту және дамыту орталығының ағылшын тілі мұғалімі