Ат спорты • 16 Тамыз, 2017

Астана клубы – ел чемпионы

148 рет көрсетілді

Алматы облысындағы Талғар ауданындағы ат спорты кешенінде шөген ойынынан Қазақстан чемпионаты өтті. Осымен екінші рет ұйымдастырылып отырған бұл турнирге еліміздің мықты деген алты командасы қатыстып, бақ сынады.

Атап айтқанда, Оңтүстік Қа­зақстан, Ақмола облыстық шө­ген федерацияларының командалары, «Аққия», «Әулие­ата» шөген клубтары, «Astana polo club» және «Almaty polo club» ұжымдары біріншілік жүл­делерін сарапқа салды.

Жарыс қорытындысында барлық ойындарында қарсы­лас­тарынан басым болған қос команда – «Astana polo club» және «Almaty polo club» клубтары турнирдің бас жүлдесі үшін майдан салды. Жалпы, бұл екі команда бірнеше халықаралық турнирге қатысып, мол тәжірибе жинақтаған азулы ұжымдар. Еске салар болсақ, «Astana Polo Club» командасы 2016 жылы Аргентинаның Лухан қаласында өткен халықаралық тур­нирде топ жарған. Бұдан бөлек, 2017 жылы Аргентинадағы «Santa Catalina Summer Cup» және «Torneo Summer Polo Match» ха­лықаралық турнирлерінде осы екі команда шетелдік шө­ген­шілерді шаң қаптырған-тұғын. Сондай-ақ, биыл елімізде өткен «Almaty Snow Polo Cup» халықаралық додасында да аталған қос команданың алтын және күміс жүлделерді өзара бөліскені бар.

Міне, осындай сыралғы қар­сыластар арасындағы ойын тар­тысқа толы болды. Матч­ты тама­шалаған жанкүйер қауым да құмардан шығып, шөген саң­лақ­тарына деген қоше­меттерін қиқу салып көрсетіп отырды. 

Сонымен, шешуші ойында шын шеберлігімен көзге түскен «Astana polo club» ұжымы алма­тылық шөгеншілерді 6:4 есебімен жеңіп, 2017 жылғы ел чемпионы атанды. Ал жүлделі үшінші орынды Ақмола облы­сының шө­геншілерінен 2:1 есебімен басым түскен «Әулие­ата» клубы иеленді. Еске салсақ, былтыр тұң­ғыш рет өткен ел чемпионатын осы «Әу­лиеата» шөген клубы жеңіп алған болатын.

«Самұрық Қазына» Ұлттық әл-ауқат қоры бас серіктес жә­не «Samruk-Kazyna Trust» әлеуметтік жобаларды дамыту қоры әлеуметтік серіктес бол­ған біріншіліктің жүлде қоры 2 миллион теңгені құрады. Қазақстанның жаңа чемпионы «Astana polo club» клубы 1 миллион теңгенің сертификатына ие болса, күміс жүлдегер атанған «Almaty polo club» командасына 600 мың теңге бұйырды. Қола медаль иесі «Әулиеата» ұжымы 400 мың теңгенің жүлдесіне қанағат етті.

Жарыс нәтижесінде үз­дік шыққан ойыншылар мен сәй­гүліктер арнайы жүлде­лермен марапатталды. Мы­салы, «Almaty polo club» коман­дасының капитаны Қуаныш Мұсабеков «Үздік ойыншы» аталымы бойынша озып шықса, «Үздік поло пони» болып «Мау­сым» атты сәйгүлік танылды.

«Егемен-ақпарат»

Соңғы жаңалықтар

Тозақтан өтсе де түңілмеген

Руханият • Бүгін, 18:00

Радист қазақ қыздары

Тарих • Бүгін, 17:10

Қарсы барлаушылар қаһармандығы

Руханият • Бүгін, 15:50

Ескерусіз кеткен есіл ер

Таным • Бүгін, 12:50

Майдангердің өнегелі жолы

Руханият • Бүгін, 10:55

Ржев шайқасының қаһарманы

Тарих • Бүгін, 10:30

Тұрлауы қиын тағдырлар

Тарих • Бүгін, 09:30

Ардагерлер азайып бара жатыр...

Қазақстан • 07 Мамыр, 2021

Елбасы және Қазақстан армиясы

Елбасы • 07 Мамыр, 2021

Бублик Карцевті қапы қалдырды

Теннис • 07 Мамыр, 2021

Ұқсас жаңалықтар