Қаржы • 08 Қыркүйек, 2017

Алысты жақындатқан ынтымақтастық

153 реткөрсетілді

2017 жылдың 6 айында Қазақстан мен Франция арасындағы сыртқы сауда айналымы 45,9 пайызға өсті

Кеше Астанада Қазақстан Республикасының Инвестициялар және даму министрі Жеңіс Қасымбек пен Француз Республикасының сыртқы істер және Еуропа министрі жанындағы Мемлекеттік хатшысы  Жан-Батист Лемуанның қатысуымен экономикалық ынтымақтастық жөніндегі Қазақстан-Француз үкіметаралық комиссиясының 13-ші отырысы өтті.

Үкіметаралық комиссия оты­рысында сауда мен инвес­ти­ция, энергетика, соның ішінде жаңғырмалы энергия көзде­рі, ғарыштық қызмет, қорша­ған ортаны қорғау, ауыл шаруа­шы­лығы, денсаулық сақтау және тағы басқа да салалар бойынша екіжақты ынтымақтастық мәсе­лелері талқыланды.
Инвестициялар және даму министрі Жеңіс Қасым­бек Францияның мамандан­ды­рылған ЭКСПО-2017 халық­аралық көрмесіне қатысуы екі елдің өзара іс-қимылының жо­ғары деңгейде екенін және жаһандық тұрақты дамуды қам­тамасыз ету мәселелері бойынша ұстанымдарының бір екенін айғақтайды, деп атап өтті. 

«Қуатты экономикалық әлеуетке ие Франция Қазақ­стан­ның Еуропадағы негізгі сауда се­ріктестерінің бірі. Екі ел ара­сындағы тауар айналым­ының өсім динамикасы қарқынды. 2017 жылдың 6 айында Қазақстан мен Франция арасындағы сыртқы сауда айналымы 1,7 млрд АҚШ дол­ларын құрады. Бұл өткен жыл­дың сәйкес кезеңімен салыс­тырғанда 45,9 пайызға жоғары», деді Ж.Қасымбек. 

Франция Қазақстанның негіз­гі сауда серіктестері тізімінде 5-ші орынды иеленеді. Сонымен қатар, Франция Қазақстанға инвестиция салу деңгейі бо­йынша да 5-ші орында. Бұл ел соңғы 12 жылда Қазақстанға 13,6 млрд доллар инвестиция салған.

Француз Республикасының сыртқы істер және Еуропа ми­нистрі жанындағы Мемлекеттік хатшысы Жан-Батист Лемуан екі елдің үкіметаралық комиссиясы жұмыс істеп жатқан осы екі күннің ішінде Қазақстан тара­бымен көптеген кездесулер өткізілгендігін айта келе, жылы қабылдау үшін алғы­сын білдірді. Оның сөзіне қара­ғанда кездесулер табысты жүру­де. «Комиссия жасаған хатта­ма­ның 10 бетке дейін жетуі біз­дің арамыздағы іскерлік байла­ныс­тардың қанатын кеңге жайып келе жатқандығын және маз­мұн­ды екендігін білдіреді» деді ол.

Француз тарабы қазақ­стан­дықтарды ЭКСПО-2017 халықаралық көрмесінің табыс­ты өтуімен құттықтады. Олар­дың айтуынша, көрмедегі француз павильонын осы уақытқа дейін 500 мыңға жуық адам келіп тамашалапты. Мұның өзі павильонның тартымды бол­ғандығын дәлелдейтін көр­сеткіш. Қазақстан тарабы фран­цуздарға көрмеге белсе­не қатысқандықтары үшін алғыс­тарын білдірді.

Отырыс барысында екі ел­дің экономикалық ынтымақтас­ты­ғының күн тәртібіндегі мәсе­лелері жүйе-жүйеге бөлініп, нақтылай қаралды. Соның ішінде Қазақстанның инвестициялық ахуалын одан әрі жақсартудың жолдары, осы ретте француз тарабынан туындайтын мәселелер нақты әңгіме болды. Француз тарабы, сондай-ақ қалалық көлік, қоршаған ортаны қорғау салаларына инвестиция салуға ынталарының бар екендігін жеткізді. Мұның сыртында фран­цуз инвесторларының қаты­суымен жалпы қуаты 14 МВт болатын жаңғырмалы қуат өнді­ру жобасын жүзеге асыру мәсе­лесі нақты әңгіме болды.

Қазақстан тарабы Фран­ция­мен арадағы атом өнеркәсібі, ғ­а­рыштық қызмет, авиация, ауыл шаруашылығы және басқа да салалардағы әріптес­тік­тің өз жемісін беріп, нақты жоба­лар­дың жүзеге асып жатқандығын атап көрсетті. Бұл жұмыстар одан әрі жалғасын таппақ.

Сұңғат ӘЛІПБАЙ,
«Егемен Қазақстан» 

Баннер
Соңғы жаңалықтар

Қарсыласы қарымды

Кәсіпқой бокс • Кеше

Тандыр наннан шеге шықты

Аймақтар • Кеше

«Jastar kerýeni» жолға шығады

Аймақтар • Кеше

Майдан тудырған сөз

Руханият • Кеше

Ұқсас жаңалықтар