Қордай ауданында орналасқан «Ветро Инвест» жауапкершілігі шектеулі серіктестігі жел электр энергиясын өндіреді. Жалпы жобалық құны 12 753 миллион болатын серіктестікте 13 тұрақты жұмыс орны ашылатын болады. Қазіргі кезде жобаның бірінші кезегі аясында 19 қондырғы орнатылып, жоба іске қосылды. Ал бүгінде кәсіпорында 11 адам тұрақты жұмыс орнымен қамтылған болса, оның ішінде 5 адам жергілікті тұрғындар болып отыр.
Бүгінде елімізде кәсіпкерлікке кең өріс ашылған. Аталған жоба бойынша мемлекеттің қолдауы ретінде 199,4 гектар жер бөлініп берілген. Сондай-ақ, бұл жоба «Бизнестің жол картасы-2020» бағдарламасы аясында алынған несиенің пайыздық ставкасын субсидиялау тетігі бойынша қолдау алған. Сонымен қатар, «Первомайские деликатесы» жауапкершілігі шектеулі серіктестігінің шұжық өндіру цехын жаңарту жобасының жалпы құны 223 миллион теңгені құрайды. Ал кәсіпорын жылына 3000 тонна етті қайта өңдеуге қауқарлы. Болашақта 70 тұрақты жұмыс орны ашылатын кәсіпорын мемлекеттің қолдауы ретінде «Даму өндіріс-ІІ» бағдарламасы аясында несие алған.
Қордай ауданы тоғыз жолдың торабында орналасқан. Алматы мен Тараз шаһарларының арасын жалғап тұрған ауданда тіршілікті тіктеуге мүмкіндік мол. Сондай-ақ, облыс экономикасын арттыруда да айтарлықтай үлес қосып отырған ауданда бұдан бөлек «BioVet KZ», «Алатау Қордай» және «Aurum Deutschland AG» жауапкершілігі шектеулі серіктестіктері де мемлекеттің қолдауы есебінен жүзеге асып отырған жобалар қатарында. Екінші бесжылдық шеңберінде қолға алынып отырған бес жоба ауданның ғана емес, облыстың да даму көрсеткіші болып саналады. Болашақта халықты жұмыспен қамтуда және өңір экономикасын арттырып, әлеуетін көтеруге де серпін беретіні анық.
Қордай ауданы бүгінде ауыл шаруашылығы саласында да айтарлықтай көрсеткішке қол жеткізіп отыр. Аудандық ауыл шаруашылығы бөлімінің мәліметінше, салаға қатысты мемлекеттік бағдарламалар бойынша да ауданда бірқатар жұмыстар атқарылған. Мәселен, «Алтын асық» бағдарламасы бойынша ағымдағы жылы 335 бас қой және «Құлан» бағдарламасы бойынша 4 бас жылқы сатып алынған.
Аймақтағы Қақпатас ауылында орналасқан «Қақпатас-Қордай» жауапкершілігі шектеулі серіктестігі өңірдегі ең ірі шаруашылықтардың бірі. Серіктестік басшысы Дүйсехан Қошалиевтің айтуынша, аталған серіктестік 799 миллион теңгеге тауарлы-сүт фермасын қайта жарақтандыру арқылы 600 бас сауын сиырға арналған Швецияның «Деловал» фирмасымен келісімге отырып, заманауи жаңа қуатты сауын қондырғыларын өндіріске енгізген. Алдағы уақытта шаруашылықтағы асыл тұқымды сауын сиырлар санын 600 басқа жеткізу жоспарда бар екен. Сүт өнімдерін өндіру және асыл тұқымды ірі қара мал өсіріп, көбейтуді қолға алған серіктестікте бүгінде 61 адам жұмыс істейді.
Жалпы, Қордай ауданында бөлшек сауда тауар айналымы, көтерме сауда тауар айналымы, негізгі капиталға салынған инвестиция көлемі де айтарлықтай өскен. Ал елді мекендерді газдандыру бойынша Қордай, Степной, Арал, Қалғұты, Жамбыл, Жаңатұрмыс, Сарыбұлақ, Қайнар, Қасық, Қақпатас, Беріктас және Бетқайнар ауылдарында газ желісі тартылған. Болашақта қалған елді мекендерді газдандыру мәселесі бойынша нақты жұмыстар қолға алынып жатыр.
Жамбыл облысының әкімі Кәрім Көкірекбаев жұмыс сапарымен Қордай ауданына барғанында, ауданның бүгінгі даму деңгейіне оң бағасын берген болатын. Сондай-ақ, қолға алынған бес жобаның артықшылықтарын да атап өткен еді. Облыстың ең әлеуетті ауданы саналатын Қордайда қанағаттанарлық тірлік көп екенін жергілікті тұрғындар да айтады. Әсіресе мемлекеттік бағдарламалардың орындалуы арқылы бірінші кезекте халықты жұмыспен қамту мәселесі оң шешімін тапқан.
Хамит ЕСАМАН,
«Егемен Қазақстан»
Жамбыл облысы
