Облыстың зиялы қауымы, жастар, оқушылар және БАҚ өкілдері қатысқан жиында Алаш үшін ардақты Бәукеңнің, Бауыржан Момышұлының келіні тағылымды ойларымен бөлісті. Сырласу кешін Әдет-ғұрып және салт-дәстүр орталығының директоры Жәнібек Тағаев жүргізіп отырды.
– Бақытжан дүниеден өткеннен кейін күйреп қалғандай күй кештім, – деді батырдың келіні. – Қазақта көңіл шәй деген болады. Осындай күйзеліп жүргенімде Оңтүстік Қазақстан облысының халқы көңіл шәйға шақырып, қайғымды жеңілдетті, өз-өзіме келуіме жәрдемдесті. Сондықтан, халқымыздың салт-дәстүрлерін барынша ұстайтын, ұлттың ұйытқысына айналған Оңтүстіктің орны мен үшін қашанда ерек.
Әдемі әзіл, жарасымды сырласумен өткен кеште талай әңгіменің тығыны ағытылды.
«Жақсы үйге түскен келін – келін, жаман үйге түскен келін – келсап». Қазақтың тағылымды қанатты сөздерінен тұздық жасаған Зейнеп Ахметова ұлттық қасиетті ардақтау жайын айтты. Салт-дәстүр дегенде көпшіліктің бесікке салу, тұсау кесу, беташар сияқты ғұрыптарды бер жағынан ғана білетіндігін мысалға келтірді.
Ұлттың тәрбиесі – анадан. Сондықтан да, «ана бір қолымен – бесікті, бір қолымен әлемді тербетеді» деген тәмсіл бар. Жазушы Зейнеп Ахметова қазақ қыздарының кейбір бейәдеп қылықтарын сынап, жақсы келін болуға талпынудың жайын айтты. «Әр қазақ келіні – ене мектебінен өту керек» деген жазушы енелердің осы қасиетті атауға лайықты болуын жақсы мысалдармен ұғынықты жеткізді. Әсерлі кеш жүрекке жақын сырласуға ұласты.
Бақтияр ТАЙЖАН,
«Егемен Қазақстан»
Оңтүстік Қазақстан облысы
