«Қарашығанақ Петролиум Оперейтинг Б.В» (КПО) компаниясы 16 қыркүйекте Ақсай қаласында құрылысы аймақтың әлеуметтік инфрақұрылымын дамыту жөніндегі бағдарлама аясында жүзеге асқан дене шынықтыру-сауықтыру кешені табысты іске қосылғаны туралы мәлімдеді.
Ашылу салтанатына Батыс Қазақстан облысының әкімі Алтай Көлгінов, Бөрлі ауданының әкімі Алдияр Халелов, КПО бас директоры Ренато Мароли, мердігер ұйымдар мен қауымдастық өкілдері қатысты.
Өз сөзінде КПО бас директоры Ренато Мароли жаңа спорт нысанының ашылуымен Ақсайдың барлық тұрғындарын құттықтай келе, оның құрылысы КПО мен Батыс Қазақстан облысының басшылығы арасында қалыптасқан жемісті ынтымақтастық пен серіктестік қарым-қатынастың арқасында салынғанын атап өтті.
Оның айтуынша, КПО нысанын іске қосу айтулы күндерге: Қарашығанақ өнімін бөлу туралы түпкілікті келісімге (ӨБТК) қол қоюдың 20 жылдығы және Бөрлі ауданының әкімшілік орталығы мен бірегей Қарашығанақ мұнай-газ конденсаты кен орнының орталығы – Ақсай қаласының 50 жылдығына орайластырылған.
«Осы кешен Ақсай тұрғындарының денсаулығын түзеуге және бос уақытында спортпен шұғылдануға арналған танымал орталыққа айналады деп үміттенеміз, – деді Ренато Мароли. – Тұрақты даму және әлеуметтік-жауапты серіктестікті қолдап келе жатқан КПО компаниясы Батыс Қазақстан облысы мен жалпы Қазақстан тұрғындарының игілігі үшін жаңа белестерді бағындыратын болады».
Дене шынықтыру-сауықтыру кешенінің жалпы ауданы 4,6 гектарды құрайды және Ақсай қаласының орталық бөлігіндегі үш қабатты ғимаратта орналасқан.
Кешеннің өзі футбол алаңынан, 1200 орындық трибунадан және жүгіру жолынан, сондай-ақ баскетбол, волейбол, теннис, ядро лақтыру мен сүңгі атуға арналған ашық алаңдардан, бокспен шұғылданатын залдардан тұрады. Жоба аясында жалпы абаттандыру және кешен аумағын көгалдандыру жұмыстары жүргізілді.
Батыс Қазақстан облысының әкімі Алтай Көлгінов өз сөзінде «Мемлекет басшысы Нұрсұлтан Назарбаев жастар арасында саламатты өмір салтын насихаттаудың, сондай-ақ жоғары жетістіктерге жеткізетін спортты дамытумен қатар, тұрғындардың дене шынықтыру және спортпен белсенді шұғылдануына арналған қажетті жағдайлардың барлығын жасаудың айрықша маңыздылығын атап өтті. Сондықтан спорт өміріміздің негізі, өскелең ұрпақ үшін де негіз болуға тиіс. Бүгінгі жаңа дене шынықтыру-сауықтыру кешенінің ашылуы – кәсіби спортшылар үшін де, спортты сүйетін әуесқойлар үшін де айтулы оқиға», деді.
Сондай-ақ ол: «Қала тұрғындары бұл кешеннің лайықты бағасын береді және осындай нысандар бізде тағы да пайда болатынына сенімдімін, мұндай нысандар қазіргі кезде өте қажет, өйткені өскелең ұрпақтың денсаулығын нығайтуға және дамытуға бағытталған», деп атап айтты.
Бұдан басқа, қала мерейтойы қарсаңында КПО әлеуметтік бағдарлама аясында жүзеге асырған Ақсай қаласының Мәметова және Темір жол көшелеріндегі, Садовая көшесінен Западная көшесіне дейінгі аралықты күрделі жөндеу жұмыстары аяқталды. Сондай-ақ Орал қаласында қала саябағының оң жағалауын абаттандырудың екінші кезеңі аяқталған болатын.
КПО жыл сайын Батыс Қазақстан облысында көптеген әлеуметтік-инфрақұрылымдық жобаларды жүзеге асыруда. Жобалардың тізбесі мен басымдылығы өңір басшылығы тарапынан белгіленеді. Осы бағдарлама аясында денсаулық сақтау, білім беру, мәдениет және спорт нысандарының құрылысы іске асырылады, сондай-ақ барлық осы жобалар тек қана қазақстандық мердігерлерді тарту арқылы орындалып отыр. Өңірдің әлеуметтік инфрақұрылымын дамытуға КПО салған инвестициялардың жалпы сомасы бүгінде 318 миллион АҚШ долларын құрайды.
Компанияның аймақты дамытуға қосып келе жатқан үлесі Қазақстан Үкіметі тарапынан лайықты бағалануда. Бизнестің әлеуметтік жауапкершілігі жөніндегі республикалық конкурста КПО «Парыз» сыйлығымен екі мәрте марапатталды, сонымен қатар «Ең озық әлеуметтік жоба» аталымы бойынша күміс «Парызды» алды.
Арман ҚҰСАЙЫНОВ
Батыс Қазақстан облысы,
Ақсай қаласы
