Түркештің «Көңіл ашар» күйімен басталған өнер мерекесі көрерменге ерекше әсер сыйлады. Облысымыздағы Дина Нұрпейісова атындағы академиялық халық аспаптар оркестріне дирижерлік еткен Арман Жүдебаевтың шығармашылық шеберлігі атыраулықтарды тәнті етті. Құрманғазы мен Динаның, Ықыластың, Нұрғиса Тілендиев пен Айтқали Жайымовтың, Қаршыға Ахмедияровтың күйлері Жайық жағасында салтанат құрды. Шетел классиктерінің шығармаларымен бірге, отандық композиторлардың әндері де орындалды. Оркестрдің сүйемелдеуімен концертке келген көрермен қосыла ән шырқады.
Шараға қатысқан облыс әкімі Нұрлан Ноғаев «Бүгінде Құрманғазы оркестрінің алғашқы қарлығаштары, ең бірінші домбырашыларының жолын жаңа буын жалғап келеді. Солардың арасында Арман Жүдебаевтың да есімі мақтанышпен айтылады» деп атап өтті.
Белгілі дирижер Атырауға сапары аясында аймақтағы халық аспаптар оркестрлерінің көркемдік жетекшілері мен дирижерлеріне шеберлік сабақтарын өткізіп, тәжірибесімен бөлісті.
Бақытгүл БАБАШ,
«Егемен Қазақстан»
