Қазақстан Республикасының Сыртқы істер министрлігі Қырғызстан БАҚ-тарында таратылған 2017 жылғы 7 қазандағы Қырғыз Республикасының президенті А.Атамбаевтың Қазақстан Республикасының басшылығына қатысты сөздеріне байланысты қатаң наразылық білдірді және мұндай сөздерге екі достас мемлекеттер арасындағы қатынастарда жол берілмеуі тиіс деп санайтынын атап көрсетті.
«Қырғызстан президентінің сайлауалды мақсатындағы жауапсыз, арандатушылық мәнді және жалған пікірі елдеріміз арасындағы достық пен өзара көмектің көп ғасырлы байланыстарына нұқсан келтіре алмайтынына сенім білдіреміз. Қазақстан тарапы қырғыз халқымен дәстүрлі бауырластық қатынастарын дамыту жолына берік болып қала береді», делінген Қазақстан Республикасы Сыртқы істер министрлігінің мәлімдемесінде.
