Шыңғырлауда ұстазға ескерткіш орнатылды

Мұғалімдер күні қарсаңында ашыл­ған бұл ескерткіштің идеясы аудандағы білім саласы ардагерлерінен шығыпты. Бастаманы барша жұрт қолдап, аудандағы білім саласы қызмет­керлері біркүндік еңбекақысын аударған. Туындыны аудан­дағы талай ескерткішті сомдап шыққан шебер Зәкіржан Исламбеков жасаған.

Ескерткіштің ашылу салтанаты Шыңғырлау ауданының 89 жылдық тойымен тұспа тұс келді. Салтанатты шараға құшақ-құшақ гүл ұстаған ұстаздар көп жиналды. Тарыдай тір­шілік иесін таудай тұлғаға айналдыратын ұлағатты ұстазға арналған мұндай ескерткіш бүкіл Орал өңірінде жоқ еді. Әрбір адам баласы бас иер аяулы жан – мұғалімнің Шыңғырлаудағы мүсіні жиынтық образ түрінде бейнеленген. Оқушы жеткіншекті жетелеп, оң қолымен иығынан демеп тұрған мұғалима алыс қиырға көз тастаған. Сол қолында – сынып журналы. Ал бүлдіршіннің қолында – бір шоқ гүл. 

– Елбасы Нұрсұлтан Назарбаев елдік даму, ұлттық бірегей­лігіміз тұрғысындағы «Туған жер» бағдарламасында әрбір қазақ­стан­дықтың өз еліне, жеріне деген пат­риоттық сезімін арттырып, туған ауылының дамуына өз үлесін қосуға шақырған болатын. Міне, бүгін жер­гілікті азаматтардың күшімен ұстаз­дардың құрметіне арналған ескерт­кіш бой көтерді. Біз бұл композиция­ны «Ғасыр ғаламаты – ұстаз» деп атадық. Бұл бүкіл адамзат баласын адалдыққа, адамгершілікке, ұлы достыққа, бейбіт­шілік пен бірлікке тәрбиелеп, білуге, ілім әлеміне шақырған ұстаздардың ұлы еңбегіне, ұлы тұлғасына қойылған ескерт­кіш болмақ. Мұндай ескерт­кішті біз республика бойын­ша алғаш­қылардың бірі болып орнатып отырмыз, – деді Шыңғырлау ауданының әкімі Альберт Есалиев.

Ұстазға арналған ескерткішті Ы.Ал­тынсарин атындағы төсбелгі, Қазақстан Республикасының Білім және ғылым минис­трлігінің «Құрмет грамотасы», аудан әкімінің «Үздік мұғалім» номи­нациясының иегері Эльмира Сапашева, Шыңғырлау орта мектебінің 11-сынып оқушысы, «Алтын белгі» үміткері Динара Акбалеева, Л.Қылышев атындағы Шилі орта мектебінің 10-сынып оқушысы, «Үздік аттестат» иегері Диас Сағынғалиев ашты. Мектеп оқу­шылары ұстаздық пен ұлылық тұр­ғысында тақпақтарын арнап, жас өнерпаздар домбырадан күй төкті.

Биылғы оқу жылында Шыңғырлау ауданында жалпы білім беретін 16 мектеп жұмыс істейді. Онда 1972 оқу­шы білім алып жатыр. 2016-2017 оқу жылының қорытындысы бойынша аудан­да 6 түлек «Алтын белгі», 1 оқу­шы «Үз­дік аттестат» иегері атанған бола­тын. 

Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы