Қалалық «Аманкелді» халық театры С.Балғабаевтың «Біз де ғашық болғанбыз», Құрманғазы ауданы, «Морской» селолық мәдениет үйі жанындағы халық театры А.Сейдімбековтің «Мезгілсіз махаббат», Мақат аудандық мәдениет үйі жанындағы халық театры Б.Жәкиевтің «Жүрейік жүрек ауыртпай» және Қызылқоға ауданы «Самал» мәдениет үйі жанындағы халық театры Б.Римованың «Қос мұңлық» драмаларын қойып, үшінші орынды тең бөлісті.
Ал Жылыой ауданы «Кең Жылыой» халық театры Р.Мұқанованың «Мәңгілік бала бейнесі» драмасымен, Индер ауданы «Индер – Мәдениет» халық театры С.Олжабайдың «Қара көзілдірікті келіншек» драмасымен екінші жүлденің иегерлері атанды.
Құрманғазы ауданы «Калинин» халық театры Ә.Тауасаровтың «Махаббат аралы» қойылымымен бірінші орынды жеңіп алды. «Үздік декорация» номинациясы Ж.Әлмашұлының «Тірі жан» драмасын сахналаған құрманғазылық «Теңіз» халық театрына берілді. «Үздік ер адам рөлі» номинациясы қызылқоғалық Сағидолла Якыпқа, «Үздік әйел адам рөлі» индерлік Гүлзира Шаукероваға лайық деп танылды.
Р.Мұқанованың «Мәңгілік бала бейнесі» драмасын сахналаған «Кең Жылыой» халық театрының режиссері Назгүл Жиенбаева «Үздік режисер», Индер ауданынан келген Саяжан Әзидоллақызы «Көрермен көзайымы» атанды.
Байқауға қазылық еткен ҚР Мәдениет қайраткері Анета Баетова: «Халықтық» театрлар Атырау облысында жақсы дамыған. Бұл өнерге деген құрметтің көрінісі. «Шынайы шымылдық» байқауы биыл төртінші рет ұйымдастырылып отыр. Жылдан-жылға театрлардың талғамы артып, репертуарлары толығып келеді», дейді.
Бақытгүл БАБАШ,
«Егемен Қазақстан»
АТЫРАУ
