Өңірлерді дамыту бағдарламасы бойынша биыл 55 елді мекенді ауыз сумен қамту жұмыстары басталған еді. 8 ауылда бұл жұмыстар аяқталды, Көшім – биыл таза су жеткізілген тоғызыншы ауыл. Жақын күндері Зеленов ауданындағы Щапов ауылы тұрғындары да осындай қуанышқа кенелмекші.
– Батысқазақстандықтар үшін орталықтандырылған ауыз сумен қамту мәселесі өте өзекті болып тұр. Қазіргі таңда өңірдегі 443 елді мекеннің 36 пайызы ғана таза ауыз сумен қамтылған. Бұл – өте төмен көрсеткіш. Сондықтан Президенттің тікелей тапсырмасы бойынша Үкімет тарапынан 55 елді мекенді таза ауыз сумен қамтамасыз ету мақсатында 11 млрд теңге бөлінген болатын. Бұл қаржының 9 млрд теңгесі биыл игерілді. Аталған жобалар жүзеге асқан кезде облыс тұрғындарының 44 пайызы таза сумен қамтылатын болады. 12 ауылға арналған жоба келер жылы аяқталады. Қалған ауылдар осы жылдың соңына дейін таза суға қол жеткізеді, дейді Батыс Қазақстан облысының әкімі Алтай Көлгінов.
Алтай Сейдірұлы тұрғындарды таза ауыз сумен қамту жұмысы келер жылы да жүретінін мәлімдеді. 2018 жылы облыста тағы 50 ауылға су тарту жұмыстары жүргізілмек. Бұл жобаларды іске асыру барысында жергілікті құрылыс материалдары қолданылуы шағын кәсіпорындар жұмысын ширатып, экономикалық өсімге қозғау болған, қосымша жұмыс орындары ашылған.
Біз сөз етіп отырған Көшім ауылын сумен қамту бағдарламасының жобалық құны 198,374 млн теңге екен. Жүйенің су сақтағыш екі мұнарасы бар. Ауыл ішінде 20 шақырым су құбыры жүргізілген. Жоспар бойынша жаңа су құбыры желтоқсан айында тапсырылуы керек-тұғын. Жобаның бас мердігері жергілікті «Нира» ЖШС мекемесі жұмысты межеленген уақытынан бұрын әрі сапалы атқарып шыққан.
– Біздің тұрғындар бұл мекеменің жауапкершілігі мол ұжым екенін біледі. Осыдан бірер жыл бұрын ауылда «Тұрғын үй-коммуналдық шаруашылығын жаңғырту» бағдарламасымен көп қабатты үйлерді күрделі жөндеп, елдің ризашылығына бөленген еді. Енді міне, ауыз су құбыры құрылысын сондай тиянақтылықпен атқарып, көңілімізді демдеді, дейді тұрғындар.
Облыс басшысымен бірге су жаңа су құбырының «құлағын бұрап», жаңа қондырғыны іске қосу құрметіне ие болған ауыл тұрғыны, еңбек ардагері Сағитжан Бегеновтің бұл ауылға келгеніне көп болмапты. Бірақ судың тақсіретін тартып үлгерген.
– Көшімге келгенімізге көп болған жоқ. Балаларым Орал қаласына жақын, күре жолдың бойында тұрған, болашағы зор ауыл деп таңдап, осы жерден жаңа үй салды. Суды көршілерімізден, жерден қазып алған құдығынан алып пайдаланып келген едік. Енді міне, таза су үйдің ішіне келіп тұр. Оны қосу үшін бір тиын да төлегеніміз жоқ – деп қуанады Сағитжан ақсақал.
Зеленов ауданының әкімі Асхат Шахаровтың айтуынша, Көшім ауылында 400-ден астам тұрғын орталықтандырылған су құбырына қосылған. Жалпы, Зеленов ауданы – облыс орталығына ең жақын орналасқан, топырағы құнарлы, өндірісі өркендеп келе жатқан өңір саналады. Ауданда барлығы 68 елді мекен бар. Биыл мұнда 5 елді мекен таза ауыз сумен қамтылса, келер жылы тағы 7 ауылды таза ауыз сумен қамтуға құжаттар дайындалып жатыр. Ол жүзеге асқанда аудан халқының 60 пайызы таза ауыз сумен қамтылатын болады.
Сөз реті келгенде айта кетейік, Зеленов ауданында келер жылы 7 ауылға табиғи газ құбырын тарту да жоспарланып отыр екен.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы
