Көшелер кеңейеді,
кептеліс азаяды
Дәл қазіргі уақытта облыс орталығындағы төрт бірдей көшеде жолдарды кеңейту жұмыстары жүргізіліп жатыр. Бүгінде қаладағы құрылыстардың дені Жібек маталар шағын ауданында қарқын алғаны белгілі. Тұрғын үй дейсіз бе, балабақша дейсіз бе, емхана дейсіз бе, барлығы осы шағын ауданда салынып жатыр. Мұндағы халық саны да жылдан жылға көбейіп келеді. Қазір Жібек маталар шағын ауданындағы Сәтбаев даңғылы бойымен Жібек жолы көшесінен Карл Маркс көшесіне дейінгі 3,5 шақырым жолды кеңейту жұмыстары қолға алынуда. Өскемен қаласы әкімінің орынбасары Ержан Қоңырбаевтың айтуынша, бұған дейін пайдаланылып келген төрт жолақты жол алдағы уақытта алты жолақты жолға айналмақ.
Сонымен қатар жаяу жүргіншілерге және велосипед тебуге арналған жолдар салынып, даңғыл бойына жаңа аялдамалар орнатылмақ. Бұған дейін қалалықтар Өзен вокзалы маңындағы жағалауда ғана «шайтанарбамен» жүйткіп жүрсе, енді Жібек маталар шағын ауданынан қалаға дейін велосипедпен желдей есіп жетуіне мүмкіндік туғызылмақ. Биыл маусымда басталған бұл жұмыстар 2018 жылы аяқталады деп жоспарланып отыр.
Бұдан бөлек қазір қаладағы Жібек жолы мен Сәтбаев даңғылдарының қиылысында, Ертіс өзені арқылы өтетін көпірден Ахмер ауылына, Тәуелсіздік, Астана мен Потанин көшелері және Әуезов даңғылынан Даңқ мемориалына дейінгі аумақтағы көшелерді кеңейту, абаттандыру жұмыстары қызу жүргізілуде. Е.Қоңырбаев осындай ауқымды жұмыстар республикалық, облыстық және қалалық бюджет қаржысымен жүзеге асырылып жатқанын айтады. Осыдан бірер күн бұрын шаһардың әр аумағында қолға алынған көшелерді кеңейту жұмыстарымен танысқан облыс әкімі Даниал Ахметов Жібек маталар шағын ауданындағы құрылыс жұмыстары сәтімен аяқталса, 15 жылға дейін кептеліс мәселесін шешуге ықпал ететінін жеткізді.
2018 жылы 100 аула жөнделеді
Қазір Өскеменде аулаларды абаттандыру жұмыстарына да айрықша көңіл бөлініп жатыр. Үш жылда облыс орталығындағы үш жүзден астам аула күрделі жөндеуден өткізіледі деп жоспарланып отыр. Облыс басшысының тапсырмасына сәйкес биылдан бастап қолға алынған жоба аясында 2020 жылға дейін шаһардағы 310 ауланың кіреберіс жолдары мен көлік тұрақтары кеңейтіліп, балаларға арналған ойын алаңқайлары жөнделетін болады. «Үш жылда облыс орталығындағы үш жүзден астам көшені адам танымастай өзгертеміз. Бұл мақсатқа бюджеттен қомақты қаражат бөлінеді. Мәселен, 2018 жылы Өскемендегі 100 ауланы абаттандыру, жөндеу жұмыстарына бір миллиард теңге көлемінде қаржы бөлуді жоспарлап отырмыз. Мұндай шаруа қаланың барлық шағын ауданында жүргізілетін болады. Әсіресе көп жыл бойы жөндеу көрмеген шалғай аулаларға басымдық берілмек», деген-ді облыс әкімі Д.Ахметов жуықта қала тұрғындарымен кездесуінде.
Бүгінде осындай аулалардың алғашқыларында тиісті жұмыстар аяқталып та қойды. Мәселен, Питер коммунарлары көшесіндегі №20, 22, 24 және 26 үйлердің аулалары жаңадан пайдалануға берілген көп қабатты үйлердің аулаларынан еш кем түспейді. Мұнда су жаңа балалар алаңы мен street workout алаңы бой көтерген. Балалар ойнайтын алаңға жұмсақ төсеніш төселіп, жаңа орындықтар қойылыпты. Тұрмыстық қалдықтар салатын арнайы орындар да қалпына келтірілген. Ауладағы кіреберіс жолдардың ені үш жарым метрге дейін кеңейтіліп, 25 көлікке арналған автотұрақ пайда болып, бір ғана ауланың өзінде бірнеше бейнекамера орнатылыпты. Бұл өз кезегінде шағын аудан мен аулалардағы қоғамдық тәртіпті нығайтып, құқық бұзушылық санын азайтуға септігін тигізуі тиіс дейді мамандар.
Тізе берсек облыс орталығын абаттандыру, ажарландыру бағытында аз шаруа атқарылып жатқан жоқ. Өскемен қаласы әкімінің орынбасары бұл жұмыстардың барлығы шаһар тұрғындарының игілігі үшін жүзеге асырылып жатқанын айтады. Биыл қалада үлкен жеті жоба іске асырылып жатыр. Тәуелсіздік пен Абай даңғылының қиылысында жер асты жолы салынуда. Комендантка өзеніне абаттандыру жұмыстары жүргізіліп, гүлдер отырғызылды. Полиция бекетін аштық. Бұл жер қазір жұрт демалатын тамаша орынға айналды. Өскеменде мемлекеттік «Нұрлы жол» бағдарламасы бойынша бірнеше тұрғын үй салынып, құбырлар жөнделіп жатыр. Бүгінде қалада екі балабақша тұрғызылуда. Жалпы, алдағы уақытта 11 балабақша салуды жоспарлап отырмыз», дейді Е.Қоңырбаев.
Азамат ҚАСЫМ,
«Егемен Қазақстан»
ӨСКЕМЕН
