Еске сала кетейік, экрандық туындының режиссері әрі сценарий авторы – Қазақстанның халық әртісі, қазақ кинематографиясы «жаңа толқынының» белгілі өкілі – Талғат Теменов. «Адамдар арасындағы бөлтірік», «Қызғыш құс», «Махаббат бекеті» сынды көпшілікке танымал фильмдерімен көрермен сүйіспеншілігіне ие Т.Теменовтің жаңа кинотуындысы жалғыздықтың күйін кешіп жүрген балалар үйінің 6 жасар тәрбиеленушісі мен қарттар үйінің ардагері арасындағы достық байланыс туралы баяндайды.
Айта кететін жайт, «Біздің қаланың ханзадасы» фильмінің тұсаукесері (жұмыс атауы «Бибол») биыл 1 маусым – халықаралық балаларды қорғау күніне орай Астана қаласында өткен болатын. Сонымен қатар аталмыш кинотуынды қыркүйек айында Ресейде өткен ІІ халықаралық «Еуразиялық көпір» кинофестивалінің негізгі бағдарламасы шеңберінде көрсетілген еді.
Фильмнің негізгі түсірілімі Астанада және Ақмола облысының Бурабай ауылында өтті. Басты рөлдерді Әнуар Төлеуғажы мен Қазақстанның еңбек сіңірген қайраткері Төлеубек Аралбай («Жаужүрек мың бала», «Жоюшы», «Тығырықтан жол тапқан») сомдайды. Сонымен қатар фильмге Қ.Қуанышбаев атындағы музыкалы драма театрының актерлері қатысқаны мәлім.
«Біздің қаланың ханзадасы» фильмін енді еліміз кинотеатрларынан тамашалауға мүмкіндік туып отыр.
Қаршыға КҮЛЕН
