Медицина • 10 Қараша, 2017

«Ақ таяқ» күні аясында офтальмологиялық тексеруден өтті

116 реткөрсетілді

Жақында халықаралық «Ақ таяқ» күні аясында «Құрмет бел­гісі» орденді Қазақ көз аурулары ғылыми-зерттеу инс­титуты Алматы қаласындағы Н.Островский атындағы зағип жә­не нашар көретін бала­ларға арналған №4 мектеп-ин­тернаттың оқушы­ларын оф­тальмологиялық тексеруден өт­кіз­ді.   

Институттың балалар бөлімшесінің офтальмологтары және резидент-офталь­мологтар 7 мен 17 жас аралы­ғындағы 200-ден аса оқушының көзін тексеріп, зерттеу жұмыстарын жүргізді. Бірнеше аптаға созылған ауқымды жұмыстың нәтижесінде мектеп тарихында алғаш рет балалардың жасы, диагнозы, жүргізілген операциялар саны, қосалқы аурулары және әрі қарай не істеу керектігі жазылған электронды база жасақталды. Тексеріс барысында балалар арасында алдағы уақытта көзге рефракциялық түзету жүргізу мақсатында Көз аурулары ғылыми-зерттеу институтында лазерлік және хирургиялық емдеуді қажет ететін 120 жағдай анықталды. 

Бұл мектеп 1932 жылы Алматы қа­ла­лық халық комиссариатының ше­ші­мімен ашылып, 1957 жылы зағип және көзі нашар көретін балаларға арналған оқу орнына Николай Остров­скийдің аты берілді. 1971 жылы мектеп қазіргі ғимаратына көшіп келді. Алматы қаласындағы көзі нашар көретін және мүлде көрмейтін балаларды оқытатын бірден-бір арнайы оқу орнында ұзақ жыл бойы орта білімді медициналық қызметкерлерден бөлек, офтальмолог дәрігерлер жұмыс істеп келген еді. Алайда соңғы жылдары елімізде тұрған жеріне байланысты емделу мүмкіндігі туындады деген сылтаумен офтальмологтың орны қысқарып, «ерекше» балалар дәрігерлер тарапынан жүргізілетін қажетті кәсіби бақылаудан айырылып қалды. 

Қазіргі таңда оқу орнында 32 сынып бар. Онда 221 бала білім алады және сыныптардың 11-інде қазақ тілінде сабақ өткізіледі. Мектепте заманауи техникамен жабдықталған, интерактивті тақталар орнатылған 15 кабинет, 2 компьютерлік сынып, үш шеберхана, спорттық зал, кітапхана, оқу және ойын залы жұмыс істеп тұр. 

Халықаралық «Ақ таяқ» күні 1970 жылы 15 қазанда халықаралық зағип­тар федерациясының қолдауымен бекі­тілген. Ақ таяқ – зағип жанның нышаны – қоғамдағы дені сау адамдарға ортамызда мүмкіндігі шектеулі жандардың өмір сүріп жатқанын, оларға біздің тарапымыздан көмек керек екенін еске салатын қасіреттің белгісі. Ақ таяқ­тың тарихы сонау 1921 жылдан бас­талады. Сол жылы көру қабілетінен айы­рылған ағылшын Джеймс Бигс көшедегі кәдімгі таяқ ұстаушылардан ерекшеленіп көріну үшін қолына ұстайтын таяғын ақ түске боятып алады. Сонымен бірге өзі сияқты за­ғип жандарға таяқтарын ақ түске бояу­ға кеңес береді. Содан он жыл өт­кен­нен кейін ғана Англия үкіметі көзі көрмейтін жандарды ақ таяқпен қамтамасыз ете бастайды. Кейіннен ақ таяқ Францияға жетеді. Ал бүгінде ақ түсті таяқ әлем бойынша зағип жан­дардың белгісі болып есептеледі. 

«Ақ таяқ» күні – жарық дүниені емін-еркін көре алмайтын, мүмкіндігі шектеулі балаларға қоғамның назарын аударып, оларға қолымыздан келгенше жәрдем беріп, жанашырлықты сездіріп, болашаққа үміті мен сенімін нығайтып, жақсылыққа жетелеудің бір мүмкіндігі. Күн сайын таңның атқаны мен күннің батқанын тамашалай алатын жандарды күн сәулесін көруді аңсайтын зағип бүлдіршіндерге қол ұшын беруге шақыру. Өйткені мұндай балалар біздің қамқорлығымыз бен көмегімізге мұқтаж.

Мақсат РАМАЗАНҰЛЫ,
журналист

АЛМАТЫ

Баннер
Соңғы жаңалықтар

Балқаш қол бұлғайды

Туризм • Кеше

ҰБТ тапсырушыларға кеңес (видео)

Қазақстан • 18 Маусым, 2019

Мишель Платини тұтқындалды

Футбол • 18 Маусым, 2019

Ұқсас жаңалықтар