Аса қауіпті жұқпалы аурулар эпидемиологиялық қадағалау бөлімінің жетекшісі Толқын Қаженованың сөзіне қарағанда, соңғы жағдай қазан айында тіркелген. Таиландта дем алған 30-40 жас аралығындағы ерлі-зайыптылар мен Вьетнамға сапарлаған ер адам безгек ауруына шалдыққан. Олар елге оралғаннан кейін өздерін жайсыз сезіне бастаған. Дене қызуының көтерілуі, бас айналу, лоқсу, тәбеттің азаюы секілді тұмауға ұқсас белгілер білінген соң дәрігерлерге қаралуға мәжбүр болған. Медициналық тексерулер қорытындысы бойынша «денге» безгегі деген диагноз қойылған.
Қазір науқастардың жағдайы жақсы. Жан-жақты ем-дом шаралары көрсетілді. Қоздырғыш тропикалық аймақтарда ғана кездесетін масалар арқылы жұққан. Сақтанбаудың соңы осындай оқыс оқиғаларға соқтырып жатады. Сондықтан шетелдерге шыққанда алдын ала қам-қарекет жасаған жөн, дейді мамандар.
Жыл сайын «денге» безгегіне 50 миллиондай адам шалдығып, 20 мыңға жуығы өмірмен қоштасады екен. Бұл дерт Таиланд, Қытай, Индонезия, Малайзия, Жапония, Коста-Рика, тағы басқа елдерге кең таралған.
Өмір ЕСҚАЛИ,
«Егемен Қазақстан»
Солтүстік Қазақстан облысы
