Біз, Парламент Мәжілісінің бір топ депутаттары 2017 жылғы 6 қыркүйекте биыл мектеп бітірген түлектерге жоғары оқу орындарында білім алу үшін бөлінген мемлекеттік білім беру гранттарын үйлестіру ісі қоғамда наразылықтар тудырғаны жөнінде Премьер-Министрдің орынбасары Е.Досаевтың атына депутаттық сауал жолдаған едік. Оған 2017 жылғы 6 қазанда № 20-34/2440 хатпен «Алтын белгі» иегерлерінің басым құқығының сақталуы және лауазымды қызметкерлерге қатысты жауапкершілік шаралары жоғары оқу орындарына қабылдау бойынша жыл сайынғы мониторинг шеңберінде ағымдағы жылғы қазанда қаралатын болады деген сырғытпа жауап берілді. Аталған мәселелерге нақты жауап болмағандықтан, біз төмендегі сұрақтарымызды Премьер-Министр Бақытжан Сағынтаевтың атына жолдадық:
1. Білім және ғылым министрлігінің мемлекеттік білім гранттарын тағайындау жөніндегі конкурстық комиссиясы қолданыстағы заңнаманы басшылыққа алмай, енді ғана дайындалып, әлі қабылданбаған заң жобасына сілтеме жасап, заң бұзушылыққа неге жол берді?
2. 2017 жылғы 26 шілдедегі «Жоғары білім алуға ақы төлеу үшін білім беру грантын беру» ережесіне өзгертулер мен толықтырулар енгізу туралы Қазақстан Республикасы Үкіметінің №446 қаулысы бойынша грант бөлуде «Алтын белгі» иегерлерінің басымдық құқығы сақталады делінген. Білім және ғылым министрлігінің осы қаулының талабын бұзуына қандай негіз болды?
3. Бірінші тізімде грант тағайындалып, екінші тізімде грантқа ілінбеген талапкерлердің мәселесі қалай шешілді? Еліміздің бір жоғары оқу орнына түсушілер тізімінен алынып тасталып, басқа өңірлердегі жоғары оқу орындарына жіберілген талапкерлердің әлеуметтік жағдайлары ескерілді ме?
4. Кейбір медициналық мамандықтар бойынша бөлінген мемлекеттік тапсырыстың медициналық жоғары оқу орындарының арасындағы бөлінісі құжаттар тапсыру аяқталуына 1 күн қалғанда жариялану себебі неде? Бұқаралық ақпарат құралдарында таралған ақпаратқа сәйкес медициналық жоғары оқу орнына түсуге «Алтын белгі» иегерлеріне берілген 220 грантты Денсаулық сақтау министрлігі бір күнде жарамсыз етіп тастағанын қалай түсінуге болады?
5. Грант бөлу кезінде екі түрлі бұйрық шығарып, қателік жіберген Білім және ғылым, Денсаулық сақтау министрліктерінің жауапты қызметкерлері қандай жауапкершілікке тартылды деген сұрақтарға да нақты жауап берілмеуінің себебі неде?
Сонымен бірге Е.Досаевтың атынан келген ресми жауапта құжатты дайындаған орындаушының аты-жөні мен телефон нөмірі көрсетілмеген. Мұның өзі Парламент депутаттарын сыйламаушылық белгісі ғана емес, Премьер-Министрдің қаулысымен бекітілген Кеңседе іс жүргізу жөніндегі нұсқаулықтың 44-тармағын бұзу деп санаймыз. Осы мәселеге де назар аударып, шаралар қолдануыңызды сұраймыз.
Әбдіманап БЕКТҰРҒАНОВ,
Мәжіліс депутаты
