Байқау үшінші рет ұйымдастырылып отыр. Оған кемінде бір жыл бойы тұрақты жұмыс істейтін, мемлекеттік тілде ақпарат тарататын, тәуелсіз қоғамдық сайттар қатысты. Конкурстың мақсаты – үздік қазақ тілді ресурстарды анықтау, олардың саны мен сапасын арттыруға үлес қосу.
Алқалы жиынға Тұңғыш Президент – Елбасы Қорының атқарушы директорының орынбасары Сұлтан Айтжанов, Мәжіліс депутаты Бақытбек Смағұл, Тілдерді дамыту және қоғамдық-саяси жұмыс комитеті төрағасының орынбасары Ғалымжан Мелдеш, сондай-ақ қоғамдық ұйымдардың және мемлекеттік органдардың өкілдері қатысты.
– Биыл жүлдеміз де, қатысушылар саны да артты. Дегенмен, назар аударатын мәселелер де жоқ емес. Биыл екі жүлдені, яғни «Балаларға арналған үздік мемлекеттік емес қазақ тілді сайт» және «Аймақтық үздік мемлекеттік емес қазақ тілді сайт» аталымдарына жүлде бермеуді жөн көрдік. Себебі, елімізде дәл осы аталымдарға сай келетін ресурс жоқ, – деді салтанатты жиында сөз алған Сұлтан Айтжанов.
Конкурсқа барлығы 33 өтінім түсті. Қазылар құрамы сайттардың мазмұны, қазақ тілі мен ұлттық құндылықтардың дәріптелуі, патриоттық тақырыптардың жиі қозғалуы, көркемдігі секілді талаптар бойынша үздіктерді анықтады.
Қорытындысында «Өткір тіл» аталымы бойынша «zheruiyq.kz» порталы, «Рухани азық» аталымында «qamshy.kz» порталы, «Терең ізденіс» аталымында «247media.kz», «Шынайы өмір» аталымында «kerekinfo.kz», «Ойын-сауық» аталымында «baribar.kz», «Жастар әлемі» аталымында «zhasatyrau.kz» порталы жеңімпаз деп танылды. Сондай-ақ ұйымдастырушылар «Спорт тынысы» аталымында «ulttyqsport.kz» және «alzhan.kz», «Білім бұлағы» аталымында «kaz-tili.kz» мен «qaztest.kz» сайттарын үздік деп тануды жөн көрді.
Аян ӘБДУӘЛИ,
«Егемен Қазақстан»
