– Роза Бағланова апамыз 90 жасына 10 ай ғана жетпей өмірден өтті. Қазақ жұртына ғана емес, КСРО аталған алып мемлекетке танымал болған әйгілі әнші бақытты ғұмыр сүрді деп айта аламын. Роза апамыздың жанында 24 жыл бірге жүріп, көмекші болдым. Бармаған жерім, баспаған тауым болмады, апамның арқасында талай-талай азаматпен етене болып кеттім. «Бақыт деген не?» десе, бақытты адамдардың қасында жүріп, қызмет ету дер едім, – дейді осы кешті ұйымдастырушы, Қазақстан Республикасының мәдениет қызметкері Қуаныш Әбдіқалымов ағынан жарылып.
Еске алу кешінде көрермендер әйгілі әнші туралы деректі фильмді тамашалап, естеліктер тыңдады. Ғарифолла Құрманғалиев атындағы Батыс Қазақстан облыстық филармониясының жанынан құрылған «Орал сазы» фольклорлық ансамблі сахнаға шығып, өнер көрсетті.
– Биыл Роза Бағланованың туғанына 95 жыл толып отыр. Осыған орай еліміздің бірқатар облысында осындай еске алу кештерін ұйымдастырдық. Қорытынды шараны келер жылдың басында Астанада өткізбекпіз. Құдайға шүкір, апамыз көзі тірісінде өзі құрған «Алтын сақа» қайырымдылық қоры әлі қызмет етіп жатыр. Жетім, мүгедек балаларға, соғыс ардагерлеріне көмек көрсетеміз. Алматы қаласында Роза Бағланованың атына көше берілді. Мұндай құрмет Астана қаласында да көрсетіледі деп күтіп отырмыз. Осы кешті ұйымдастыруға демеушілік көрсеткен «Эйр Астана» әуе компаниясына алғысым шексіз, – дейді әншінің продюсері Қуаныш Өтешұлы.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ
Суретті түсірген
Айбатыр НҰРАШ
