Жиынды ашып берген облыс әкімі мейрамның маңыздылығына мән берді.
– Тәуелсіздік күні – еліміздің ең ұлы мерекесі. Армандаған азаттық таңын қарсы алдық. Президент Нұрсұлтан Назарбаев Тәңірдің ұлы сыйы – Тәуелсіздік екенін айтты. Егемендік жылдарында Қазақстан еңселі биіктерді бағындырды. Әрине, бір жеңнен қол, бір жағадан бас шығарған бірліктің арқасы. Қарағанды жері ынтымақтың өлкесіне айналды. Ынтымақ бар өңірден ырыс айналмайды. Достығымыз жараса берсін, – деді өңір басшысы.
Жиын барысында Елбасы Жарлығына сәйкес, аймақтың саяси және қоғамдық өміріне белсене араласып, елдің әлеуметтік-экономикалық және мәдени дамуына елеулі еңбек сіңірген, ұлттар арасындағы достық пен ынтымақтастықты нығайтуға қосқан сүбелі үлесі үшін бірқатар азаматтар мемлекеттік марапаттарға ие болды.
Қарағанды мемлекеттік университетінің ректоры Еркін Көбеев, Нұра ауданындағы «Жараспай» ЖШС директоры Сейілхан Қоңырбаев «Парасат» орденін өңіріне тақты. Сондай-ақ «Құрмет» орденіне Теміртау қаласының әкімі Ғалым Әшімов, облыстық туберкулезге қарсы диспансер директоры Ноян Бидайбаев, Қарағанды облысының құрметті азаматы Николай Дрижд, Абай ауданындағы «Шанс» шаруа қожалығының жетекшісі Игорь Жабяк, «Қазақмыс Энерджи» ЖШС атқарушы директоры Ахат Календарев, жезқазғандық еңбек ардагері Сағындық Қожамсейітов, Қарағандыдағы «Шығыс» шаруа қожалығының жетекшісі Шамиль Осин, облыстық мәслихат депутаты Айман Түкбаева, Жезқазған қаласының өкілі, еңбек ардагері Жақсылық Шоқтаев ие болды. Ал «Шапағат» медаліне қол жеткізгендер қатарында облыстық мәслихат депутаты Бекзат Алтынбеков, қалалық бастауыш медициналық-санитарлық көмек орталығының директоры Татьяна Баширова, Қаражал қалалық орталық ауруханасының перзентхана бөлімінің акушері Гүлнәр Жақыпбекова, Бұқар жырау аудандық орталық ауруханасының хирургия бөлімінің меңгерушісі Мереке Жұмақаев, Жезқазған қалалық орталық ауруханасы эндоскопия бөлімшесінің меңгерушісі Бейсен Көлбаев, облыстық туберкулезге қарсы диспансер Жезқазған бөлімшесінің фтизиатр-дәрігері Марияш Оразбекова болды. «Қазақстанның еңбек сіңірген қайраткері» атағы Қарағанды қаласының құрметті азаматы Рымбала Омарбекова және еңбек ардагері Жағыпар Әлімхановқа табысталды.Жиында ІІІ дәрежелі «Еңбек даңқы» ордені, «Ерен еңбегі үшін» медалі және құрмет грамоталары тапсырылды.Салтанатты жиынның ең елеулі сәттерінің бірі, әрине ол Қарағанды облысының құрметті азаматы атанған азаматтардың есімін айтатын мезет. Әуелі аймақ басшысы қазыналы өлкенің тумасы, мемлекет және қоғам қайраткері, Ұлы Отан соғысының ардагері Камали Дүйсембеков ағамызға «Құрметті азамат» атағын тапсыру үшін сахнадан түсті. Сонымен қатар «Халық қаhарманы», армия генералы Мұхтар Алтынбаев ағамызға облыстың Құрметті азаматы атағы берілді. Генералдың үлкен өмірге сапары көмірлі өлкеден басталғаны белгілі.
– Жерлестеріме мың алғыс. Бұл құрмет – маған көрсетілген зор сенім деп білемін. Мен алғаш осы жерден көкке көтерілдім. Сыйдың үлкенін Қарағанды жұртынан көргеніме ризамын, – деді генерал. Сонымен қатар бұл атаққа Алаштың туын аспандатып жүрген атпал азамат, чемпион Геннадий Головкин де ие болды.
– Бүгін үш батыр Қарағанды облысының құрметті азаматы атанды. Бірі – өздеріңіз білетін сыйлы ағамыз Камали Жұматайұлы. Халық қаһарманы, генерал Мұхтар Алтынбаевтың орны бір бөлек. Және әлем танитын Геннадий Головкинге Құрметті азамат атағын берудің орайы келіп тұр. Жұрт білетіндей, Геннадий кезекті жекпе-жегіне дайындалу үшін жаттығу жиынында жүр. Бұйыртса, Қарағандыға келеді деп ойлаймын. Салтанатты рәсімде атақты тапсырамыз, – деді облыс әкімі.
Топтаманы дайындаған
Мирас АСАН,
«Егемен Қазақстан»
Қарағанды облысы
Суреттерді түсірген
Дмитрий Кузмичев
