Медицина • 01 Ақпан, 2018

Халықтық бақылау маңызды

597 рет
көрсетілді
5 мин
оқу үшін

Мемлекет басшысы биылғы Жолдауында денсаулық сақтау саласы халықтың, мемлекеттің және жұмыс берушінің ортақ жауапкершілігіне негізделген Міндетті әлеуметтік медициналық сақтандыру жүйесіне кезең-кезеңімен көшетінін айтқан болатын. Осы ретте «Әлеуметтік медициналық сақтандыру қоры» КЕАҚ Жолдауда белгіленген міндеттерді атқаруға кірісіп кетті. Бұл туралы аталған қордың баспасөз қызметі хабарлады.

 

Халықтық бақылау маңызды

Хабарламаға сүйенсек, қор Жолдаудағы ең маңызды үш міндетке басымдық бермек. Біріншісі, ақпараттық жүйелер мен мобильді қосымшаларды дамыту арқылы медициналық көмектің қолжетімділігі мен тиімділігін қам­тама­сыз ету. Еске сала кетейік, былтыр қа­раша айында қордың мобильді қосымшасы іске қосылған болатын. «МСҚ: Халықтық ба­қылау» деп аталатын қосымша еліміздегі ауру­ханалар мен емханалар қызметін бағалауға мүмкіндік береді. Қосымшаны ұялы телефонға жүктеп, кепілдендірілген тегін медициналық көмек шеңберінде қызмет көрсететін емдеу мекемелерінің жұмысына баға беруге бо­ла­ды. Емхана немесе стационар қызметі дәрігер қабылдауына кіруге кеткен уақыт, көрсетілген қызмет сапасы, дәрігер берген емнің түсініктілігі сынды өлшемдер негізінде бағаланады. Сонымен қатар қосымшаны пайдаланушылар кез келген медицина ұйымы жайлы пікірін еркін түрде жазып қалдыра алады. Алдағы уақытта осы пікірлер негізінде клиникалардың рейтингі жасалады. Ал бұл азаматтарға еліміздегі ең үздік емханалар мен клиникаларды таңдауға көмектеспек. «Ха­лықтық бақылау» қосымшасын Android және iOS платформаларымен жұмыс істейтін смартфондарға орнатуға болады. Мобильді қосымша үнемі жаңартылып, толықтырылып отырмақ. Алдағы уақытта оған емханаға тіркелу, медициналық қызмет сапасын бағалау, дәрігер қабылдауына жазылу сынды функцияарды қосу көзделіп отыр, дейді қордың баспасөз қызметі.

Екіншісі, кепілдендірілген тегін медици­налық көмек көлемін оңтайландыру. Жалпы, бұл құжат Үкімет тарапынан бекітіледі. Біз өз ұсы­ныстарымызды әзірлеп өкілетті органға бе­реміз. Бір сөзбен айтқанда, кепілдендірілген тегін медициналық көмек пакеті қайта қаралады деуге болады. Болашақта мемлекет үшін тиімділігі төмен әрі шығыны көп диспансерлік жүйеден бас тартып, оның орнына созылмалы сырқаттарды қашықтықтан диагностика жасау және амбулаторлық емдеу тәсілдерін пайдалану арқылы емдеу жүйесіне көшу көзделіп отыр, делінген хабарламада.

Алдағы екі жылда қор кепілдендірілген тегін медициналық көмек пен әлеуметтік медициналық сақтандыру пакеттеріне кіретін қызмет түрлерін іріктеумен айналыспақ. Іріктеу барысында медициналық қызметтерге деген сұраныс пен олардың тиімділігі міндетті түрде ескеріледі.

Үшіншіден, стационарлық көмектен профи­лак­тикаға және өзге де қызмет түрлеріне көшу. Мем­лекет басшысы биылғы Жолдауында қа­зір­гі денсаулық сақтау жүйесінің бағасы қым­бат болып келетін стационарлық емге емес, аурудың алдын алуға ден қоюы керектігін қадап айтты. Себебі елімізде науқастардың 70 па­йызы дәрігерге ауруы әбден асқынғаннан кейін қаралады. Соның салдарынан азаматтардың шығыны мен мемлекет қалтасынан шығатын қаражат бірнеше есе артады. Бұл ретте бола­шақта стационарды алмастыратын қызмет түр­ле­рін көбейтуге, соған басымдық беру­ге күш салынбақ. 2018 жылдан бастап кепіл­дендірілген тегін медициналық көмекке бө­лі­нетін қаражаттың 5 пайызы осы қызмет түр­леріне жұмсалатын болады. Сонымен қатар профилактикалық іс-шаралар ауқымын едәуір арттыру көзделіп отыр.

Ал өзін-өзі жұмыспен қамтығандар медици­налық қызметке қалай қол жеткізеді? Биылғы Жолдауда халықты лайықты әлеуметтік қорғау жүйесін құру және сапалы жұмыспен қамту проблемасы айтылғаны белгілі. Мемлекет басшысы бұл мәселені шешу үшін азаматтардың мүмкіндіктерін арттыру қажеттігін, өзін-өзі жұмыспен қамтығандарды тіркеу үдерісін жеңілдету керектігін айтты. Яғни қолайлы жағдай жасалса азаматтар үшін мемлекет алдындағы міндеттерін қалтқысыз орындау тиімді болары сөзсіз.

Қазіргі уақытта мемлекеттік органдар Пре­­зиденттің өзін-өзі жұмыспен қамтыған ха­лықты экономикаға жұмылдырып, әлеуметтік медициналық сақтандыру жүйесіне тарту ту­ралы тапсырмасына сәйкес бірқатар іс-ша­ралар легін әзірледі. Атап айтсақ, заң ак­тілерінде «өзін-өзі жұмыспен қамтыған» түсі­нігін нақтылау, өз күнін өзі көріп жүрген азаматтарды мемлекеттік табыс органдарында тіркеу тәртібін жеңілдету, олардан салық өндіру тәртібін айқындау, өзін-өзі жұмыспен қамтығандар мен жұмыссыз азаматтарды тіркейтін мекемелер қызметін толығымен цифрландыру, жергілікті атқару органдары мен орталық мемлекеттік органдардың ақпараттық жүйелерін бір-бірімен ықпалдастыру көз­делген. Оған қоса, өзін-өзі жұмыспен қамтыған азаматтарға аз мөлшерде жарна төлеп, МӘМС пакетін толық пайдалануға мүмкіндік берілетінін де айта кеткеніміз жөн.

Думан АНАШ,

«Егемен Қазақстан»