![Құтқарушы Канкава](/article_photo/1517466909_article_b.jpeg)
«Егемен Қазақстан» газеті жаңа маусымда қазақ клубтарының қатарына қосылған кейбір легионер футболшыларды кеңінен таныстыруды бастайды. Көптің ортасынан көзге түсіп, топтың ортасынан төбе көрсетеді деген үмітпен. Бүгінгі кейіпкеріміз – Джаба Канкава.
2014 жыл. Днепропетровск қаласы. Жергілікті «Днепр» мен Киевтің «Динамосы» арасындағы маңызды ойын. Кездесудің бел ортасында күтпеген жағдай болды. Қонақтар шабуылшысы Олег Гусев қарсылас команданың қақпашысы Денис Бойкамен допқа таласта қатты қақтығысты. Басынан ауыр соққы алған Гусев әлгі жерде есінен танып қалды. Сол уақытта футболшыға алаң иелерінің ойыншысы дер уақытында алғашқы көмек көрсетіп, өлімнен арашалап қалды. Дәрігерлердің айтуынша, алғашқы көмек дер кезінде көрсетілмегенде Гусевтің өміріне қауіп төніп тұрған екен. Украин футболшысының өмірін құтқарып қалған – Джаба Канкава еді. Сол оқиғадан кейін Украинаның кез келген қаласында Канкаваға деген құрмет, жанкүйерлердің ыстық ықыласы арта түсті. Ажалға араша болған Канкава адамгершілік тұрғысынан да өзінің мықтылығын көрсетті.
– Менің орнымда кез келген адам солай істеуші еді, мұнымды ерлікке санамаймын. Ең бастысы, бәрі дұрыс аяқталды. Қолымнан келгенін жасадым, – деген еді сол кезде футболшы.
Грузин футболшысы күні кеше ғана Қостанайдың «Тобылымен» келісімшартқа отырды. Джаба Канкава туралы көп нәрсе айтуға болады. Грузия ұлттық құрамасының капитаны. Бірнеше рет өз елінің үздік футболшысы атанған. Грузияда танымалдығы жағынан әйгілі Кахабер Каладзеден кем түспейді.
Атақты «Динамо» (Тбилиси) футбол клубының түлегі «Днепрде» де керемет ойындарымен көзге түсті. Украин командасы 2014-2015 маусымында Еуропа футболында атой салды. Кұрамында Коноплянка, Ротан, Канкава сияқты мықтылар жиналған Днепропетровск жігіттері азулы «Олимпиакос», «Аякс», «Наполи» командаларын жеңіп, Еуропа лигасының финалына дейін жетті. Тек финалда ғана атақты «Севиляға» жол берді.
Джаба Канкава – қорғанысқа жақын ойнайтын жартылай қорғаушы. Осыған дейін «Динамо» (Тбилиси), «Алания» (Владикавказ), «Арсенал» (Киев), «Днепр» (Днепропетровск) командаларында ойнаған. Футболшының соңғы ойнаған командасы – Францияның «Реймс» ұжымы. Француздармен үш жылдық келісімшартқа отырған еді. Алайда біржарым жылдан кейін «Реймстен» кетуіне мәжбүр болды. Команданың төменгі лигаға түсіп қалуы Канкаваның ұмтылысына, ойынына да кері әсерін тигізді. Франциядан кеткен соң Джабаға «Метц», «Ницца» «Малага» командалары қызығушылық танытқан. Көктемде аталған командалармен келіссөз жүргізгені туралы ақпарат тараған, алайда белгісіз себептерге байланысты ешбірімен ортақ мəмілеге келе алмады. Биыл қыста «Тобылдың» ұсынысын қабылдап, Қостанайдан бір-ақ шықты.
Украиналық спорт журналисі Виктор Хохлюк Канкаваға қатысты мынадай мінездеме береді. «Дене бітімі мығым, жігерлі, техникасы мықты футболшы. Жасыл алаңды жақсы көре білуімен көзге түседі. Қорғанысқа көп көңіл бөледі. Алыс қашықтықтағы әріптестеріне допты шебер жеткізумен ерекшеленеді. Соққылары жойқын. Əріптестерімен тез тіл табысады. Футболдан тыс былайғы өмірде де көшбасшы жігіт», деп мақтауын жеткізген. Қазақстан біріншілігі ойындарында дəл осындай қасиеттерін, шеберлігін, мықтылығын көрсетіп жатса, артылған үміттің, сенімнің ақталғаны.
«Тобылдың» бас бапкері ойыншының мүмкіндігін жақсы біледі. Канкаваның командаға келуіне Владимир Никитенко тікелей мүдделі болыпты. Жартылай қорғаушының әлеуетін тиімді пайдаланса, қостанайлықтардың алысқа шабары анық.
Бір жағынан ұлттық біріншілігімізге жасы келген, Ресейдің немесе Украинаның командаларына жарамай қалған футболшылар келеді деген әңгіме жиі айтылды. Дегенмен, Канкава сияқты марқасқалардың жөні бөлек. Халықаралық тəжірбиесі мол, Еуропа лигасының финалында ойнаған, ұлттық құрамасының көшбасшысы. Кəсібилігімен, жүріп-тұрысымен жас футболшыларға үлгі болып, футболдың көп сырын үйретері анық. «Тобылдағы» талай таланттарды қанатының астына алар, жол көрсетер, бар білгенімен бөлісер, қамқорлық танытар...
Көпті көрген тәжірибелі ойыншылар осындай ерекшелігімен құнды. Олардың ҚПЛ-ға футболдағы ғұмырын аяқтауға келгені айтпаса да белгілі. Әйтсе де Еуропадан қырық үш күндік кемдігі бар қазақ футболы үшін мұндай ойыншылар қажет-ақ.
Еркебұлан ЖОМАРТ,
«Егемен Қазақстан»