Оған арнайы келген Премьер-Министрдің орынбасары – Ауыл шаруашылығы министрі Өмірзақ Шөкеев облыс әкімдерінің ауыл шаруашылығы саласына жетекшілік жасайтын орынбасарлары және өңірлердегі ірі агроөнеркәсіп кешенінің жетекшілері алдында Жолдаудағы үшінші міндетте қойылған талаптарға қатысты алдағы кезде атқарылатын істер жөнінде егжей-тегжейлі айтып берді. Осыған байланысты Үкіметте саланы алға қарай дамытудың басым бағыттары белгіленген. Біздің қазіргі іс-қимылымыз осы бағыттар бойынша жүйелі жұмыс жүргізуге бағытталуы тиіс, деп атап көрсетті Ө.Шөкеев.
Өңірге екі күндік жұмыс сапары кезінде сала басшысы мұндағы агроөнеркәсіп кешенінің жай-күйімен және осы бағыттағы бірқатар нысандармен танысты. Сондықтан да ол жиында осы мәселелерге байланысты көңілге түйгендерін Жолдау талаптары мен сабақтастыра отырып түйіндеп берді. Айталық, Ө.Шөкеевтің мәлімдеуінше, аймақтағы «АкТеп», «Айс» және «Ақтөбе ет кластері» ЖШС секілді өңдеуші құрылымдар еңбек өнімділігін арттыру жөнінде оң нәтижелерге қол жеткізе білген. Алғашқы аталған нысанда агрокластер құру ісінің құптарлық көріністері бар екені де сала басшысының оң бағасына ие болды. Осындай тәжірибелерден үйреніп, оны әрі қарай дамыта берудің тиімділігі мол, деді ол.
Ө.Шөкеевтің өңірге сапары барысында ет кластерін дамытудың және ет экспорты көлемін одан әрі ұлғайтудың толғағы жеткен мәселелері талқыланды. Бұған ең қажетті алғышарттың бірі – көлік-логистика инфрақұрылымын дамыту. Біз ежелден мал өсірген, осы саланың жай-күйін жетік білетін халықтың ұрпағымыз. Қазіргі қазақтың ұлан-байтақ даласы мен құнарлы жері жайылымдық мал шаруашылығын дамытуға өте ыңғайлы. Солай бола тұра мал, соның ішінде ірі қара малының өнімдері бізге импорттық жолмен келуі қаншалықты тиімді. Оның ішінде экспорттық мал өнімдерін, соның ішінде сиыр еті экспортын ұлғайта түскеніміз жөн емес пе. Премьер-Министрдің орынбасары – Ауыл шаруашылығы министрі Ө.Шөкеевтің қатысуымен өткізілген «Ақылды технологиялар – агронеркәсіп кешенін қарқынды дамыту мүмкіндігі» атты республикалық семинарға қатысушылар осы мәселелер төңірегінде де жан-жақты ой-пікірлер алмасты.
Республикалық семинарда Ақтөбе облысының әкімі Б.Сапарбаев агроөнеркәсіп кешенін өркендету ісіне тұтастай ел өңірінде және облыста атқарылуға тиісті кейбір мәселелерге тоқталды. Оның біріншісі фермерлер мен шағын ауылшаруашылық өнімін өндірушілерге қызмет көрсететін бірыңғай орталық құру болып табылады. Мұндай жағдайда артық шығындар азайып, шағын агроқұрылымдар қызметінің тиімділігі көтеріле түседі. Олар әлекедей жалаңдаған алыпсатарлар мен делдалдарға жем болмайды. Сондай-ақ өңір басшысы экспорттық мал өнімдері үлесін көбейту үшін әлі де пайдаланылмай жүрген резервтер мен мүмкіндіктерді іске қосу қажеттігін айтты.
Сапар қорытындысында Ө.Шөкеев Үкіметтің еліміздегі үлкен өңдеуші агроқұрылымдарға көрсеткен қолдауының кіші шаруашылықтарға да көмегі бола алатынын атап өтті. Айталық, осы Ақтөбе аймағында «АкТеп» және «Айс» секілді өңдеуші кәсіпорындардың құрамында белгілі бір жобаны игеруге қатысы бар көптеген ұсақ құрылымдар бар. Біз осы іспеттес құрылымдарды қолдай білсек, осы төңіректегі ұсақ шаруашылықтар да қолдаудан тыс қала алмайды. Агрокластер құру мен оған қатысты шағын құрылымдарды дамытудың басты бір тұтқасы да осы тұстан табылады, деді Ө.Шөкеев.
Темір ҚҰСАЙЫН,
«Егемен Қазақстан»
Ақтөбе облысы
