Шара ұйымдастырушылары - Индер аудандық әкімдігі. Жарыстың мақсаты - Оңтүстік Кореядағы қысқы олимпиада ойындарына қатысып жатқан қазақстандық олимпиадашыларға қолдау білдіру. Индер ауданының әкімі Серік Арыстанның айтуынша, балалардың ұмтылысы жақсы, сондықтан жергілікті оқушылар аймақаралық жарыстарда ылғи жүлделі орынға ие.
«Өткен жылы барлық мектептерге шаңғы мен коньки алынды. Басты мақсат – ауданда қысқы спорт түрлерін дамыту. Бүгінгі күнге дейін балалардың жаттығуына мүмкіндік болмады. Енді барлық мектепте өз командалары бар. Бүгін аудан тарихында алғаш рет қазақстандық олимпиадашыларды қолдау мақсатында сайыс өткіздік», дейді Серік Арыстан.
Таза ауадағы қызықты сайыс ешкімді бей-жай қалдырмады.
«Осындай жарыстар жиі өтіп тұрғанын қалаймын. Біз көрші облыстарда өткен осындай жарыстарға қатысып, екінші орын алдық. Енді ылғи жаттығып, келесі жарыстарда міндетті түрде жүлделі орын аламыз», деді қатысушылардың бірі Сұлтанбек Рахметов.
Айта кетейік, өңірде жазғы спорт түрлері дәстүрлі түрде қарқынды дамып келеді. Өткен жылдан бастап мұнда қысқы спорт түрлерін дамытуды да қолға алған. Тек Индер ауданында ғана 49 миллион теңгеге барлық мектептерге қажетті құралдар алынды.
