Қазақстан • 03 Сәуір, 2018

Әлеуметтік дамудың бес тетігі

39 реткөрсетілді

Елбасы Н.Назарбаевтың халыққа арна­ған әр Жолдауы, мақаласы және Үн­деулері – аса өзекті, страте­гия­лық маңыз­ға ие тарихи саяси құ­жаттар. 

Парламент палата­лары­ның бір­лескен отырысында өз отандастарына арнаған «Пре­зи­денттің бес әлеуметтік бас­та­масы» атты Үндеуі бұған дейінгі «Болашаққа бағдар: руха­ни жаңғыру» мақаласы мен «Төртінші өнеркәсіптік революция жағдайындағы даму­дың жаңа мүмкіндіктері» атты Жолдауының заңды жалғасы. Үндеудегі бес бастаманы жоға­рыда аталған бағдар­лама­лар­дағы міндеттердің орындалуын қамтамасыз ететін тетіктер деуге де болады. Өйт­кені, бұл бастамалар негізінен ха­лық­тың, оның ішінде еліміздің келе­шегі жастардың әлеуметтік проблемаларын шешуге арнал­ған.

Үндеудің бірінші бастамасы «Әрбір отбасына баспана алу­дың жаңа мүмкіндіктерін беру» деп аталады. Бұл бастама­сын­да Елбасы баспана алудың «7 – 20 – 25»бағдарламасын ұсы­н­ған. Бағдарламаға сай несие­ге алынған қаражаттың үстем­­ақысы 14-16 пайыздан 7 пайыз­ға дейін төмендеп, банкке төленетін бастапқы жарна 30-50 пайыздан 20 пайызға дейін қыс­қарған. Ал толық төлеу мер­зімі 10-15 жыл­дан 25 жылға д­ейін ұзар­тыл­мақ. Әрине бұл ша­ра қара­пайым азаматтар мен ен­ді ғана шаңырақ көтерген жас жұ­бай­лар үшін үлкен көмек болады.

Елбасының 2019 жылдан бас­тап, жалақы мөлшері 60 мың теңгеден аспайтын азматтардың табыс салығын 10 есеге дейін қыс­қарту туралы ұсынысы да көп­шіліктің көңілінен шығып, қол­дауына ие болып отыр. Сон­дай-ақ Президент Үндеуінде өзін-өзі жұмыспен қамтыған және жұмыссыз жүрген азматтар үшін шағын несие беру тетіктері, елді көгілдер отынмен қамтамасыз ету мәселесі де ұмыт қалмаған.

Еліміздің студенттері мен ұстаздар қауымы білім алудың мем­лекеттен бөлінетін гранттар сан­ының 20 мыңға дейін ұлғай­тылатындығын зор тебіре­ніс­пен қарсы алды десек артық айт­қандық болмас. Сөз жоқ, бұл шара жоғары білім алуды қолжетімді етудегі игі бастама болмақ.

Сондай-ақ Президенттің Үкі­метке 2022 жылдың соңына дейін 75 мың орындық жаңа жатақ­ханалар салуды тапсыруын, оның студент жастарға деген әкелік қамқорлығының шынайы көрінісі деп білуіміз қажет.

Сүйікті Отанымыздың халық­аралық бәсекеге қабілеттілігі, оның гүлдене өркендеп, әлемнің мейлінше дамыған 30 елінің құрамынан көрінуі жастардың қолында. Елбасының биыл­ғы Жолдауында көтерілген төртін­ші өнеркәсіптік революцияны жүзеге асыру терең білімді, жоғары білікті мамандарсыз тіпті де мүм­кін емес. Қоғамның негізі қоз­ғау­шы күші болып табылатын сол мамандар, біздің бүгінгі сту­дентер. Міне, сондықтан да Пре­зидент студентердің әлеуметтік жағдайын бір мезет те назардан тыс қалдырған емес.

Халқына арнаған өз Үндеуін Президент: «Бүгінгі бастамалар еліміз тұтас, қоғамымыз тұрақты болса ғана табысты жүзеге асады. Ал ел бірлігі – ең бірінші қазақтың бірлігі. Жаһандық көштің басында жүретін мерейлі ел болу үшін, бірлік пен ынтымақ алдымен өзімізге – қазаққа керек», деп түйіндеді. Елбасының бұл жерде сирек те болса байқалып қалатын рушылдық, жершілдік деген келеңсіз құбылыстарды меңзеп отырғандығы айтпаса да түсінікті.

Ынтымақ пен бірлігімізді көзіміздің қарашығындай сақтап, ту етіп ұстайық, қадірлі ағайын!

Саттар ҚУАШБАЙ,
экономика ғылымдарының докторы, профессор

Баннер
Соңғы жаңалықтар

Еділ мен Жайық суы араласты

Аймақтар • Бүгін, 10:04

Ұқсас жаңалықтар