Шара «Жастар және ғылым: бүгіні мен болашағы» тақырыбындағы Республикалық ғылыми-тәжірибелік конференция аясында ұйымдастырылып отыр.
Байқаудың мақсаты – жас ғалымдардың жасампаздық әлеуетін дамыту, оларды заманауи ғылымның маңызды мәселелерін шешуге белсенді түрде тарту, университет білім алушыларының шығармашылық қабілетін ашу және инновациялық кәсіпкерлікке тарту. Сонымен қатар, жастардың әлеуметтік бағыттағы кәсіпкерлік мәдениеті мен көшбасшылық дағдыларын қалыптастыру, бизнес қауымдастықтарымен және өзге мүдделі тараптармен байланыс орнату.
Байқауға Қыздар Университетінің күндізгі бөлімінің 1, 2, 3-курс студенттері мен 1-курс магистранттарынан барлығы 16 жоба келіп түскен. Соның ішінде Жаратылыстану факультетінің 1-курс студенті А. Садырбекованың «Жабық жабында өсірілген бағалы жемістерді вируссыз тәсіл арқылы өсіру», Жаратылыстану факультетінің 2-курс студенттері Ғ. Нұрпейісқызы, А. Әбдіманаптың «Жауын құртын (Lumbricus terrestris) коммерциялық бағытта қолдан өсіру», Жаратылыстану факультетінің 2-курс студенттері Д. Булханова, Ғ. Тулақ пен Ғ. Нұрпейісқызының «Медициналық сүлікті коммерциялық мақсатта кеңінен пайдалану», Физика-математика факультетінің студенті А. Бердіқожаның «Тұрақты кернеуді түрлендіруге арналған инвентор» және Педагогика-психолоия факультетінің студенттері Ж. Еркеқұл мен Д. Матниязованың «Білім беру жүйесін цифрландыру: «Ұлы ойшылдардың ой-пікірлеріндегі педагогикалық идеялар» атты жобалары байқау комиссиясы тарапынан жоғары баға алды. Жеңімпаздар республикалық «Startup-Bolashak» инновациялық жобалар байқауына университет атынан қатысады және жобалары қазылар алқасы тарапынан үздік деп танылса 200 мың теңге көлеміндегі қаржылай сыйақымен марапатталады. Ал, екінші орын иегері 100 мың теңге, үшінші орын иегері 50 мың теңгеге ие болмақ.
Сайыс «Заманауи филологиялық ғылымдар және әлемнің ұлттық бейнесі», «Еліміздегі және әлемдегі педагогика және психология: қазіргі теория және тәжірибе», «Қазақ қоғамының санасын жаңғырту үдерісіндегі әлеуметтік-гуманитарлық білім», «Жаратылыстану ғылымдары: инновациялық технологиялар мен идеялар», «Цифрлық Қазақстан: физика-математика ғылымдарының жаңа серпілісі» және «Жаһандық әлемдегі заманауи қазақстандық мәдениет» бағыттары бойынша өтті.
Байқау қорытындысын шығаруға арналған сараптамалық комиссияның құрамы ҚР Тұңғыш Президенті – Елбасы қоры, Алматы қаласы, Алмалы аудандық жұмыспен қамту орталығы, «Даму» кәсіпкерлікті дамыту қоры» АҚ, «KaznexInvest» экспорттау және инвестициялау бойынша ұлттық агенттігі, «АТФ Банк» АҚ қызметкерлері мен бизнес өкілдерінен тұрады. Қазылар алқасы жобаларды инновациялық өлшемдер бойынша іріктеп, белгіленген аталымдар бойынша байқау жеңімпаздарын анықтайды.
– Жастардың шығармашылық, ғылыми-зерттеу жұмыстарын насихаттау мен оны кең көлемде жариялауда, олардың тұлғалық дамудың тәсілі ретіндегі жобалық зерттеу іс-әрекеттеріне тартуда және білім беру үрдісінің тиімділігін көтеру мен қолданбалы ғылымға деген қызығушылықтарын дамытуда осы тақілеттес жиындардың маңызы зор, – дейді шара ұйымдастырушылары.
