Зайсандық әжелер «Ән салу», «Хормен ән салу», «Дәстүрлі ән», «Мәнерлеп өлең оқу», «Ақындық өнер», «Аспапта ойнау», «Бата беру», «Қолөнер», «Суретшілік өнер» сынды бөлімдерден тұрған бәсекенің «Хормен ән салу» бағытында бақ сынап, әйгілі композитор Шәмші Қалдаяқовтың және халық әндерін әуелете шырқап, топ жарыпты. Ақ жаулықты аналарымыз «Ән салу» жанрында да өрелі өнер көрсетіпті. Жеке ән орындауда 50-60 жас аралығындағы қатысушылар ішінен қараталдық Сақыш Нұрпейісова, 71-80 жас аралығындағы сайыскерлер санатында Бәкира Мүлікова бас жүлдені иеленіпті.
Ал дуэтпен ән салуда Ұлбосын Қайсақова мен Болат Ақбаева ансамбль қоржынына тағы бір бас жүлдені салып, облысымыздың мерейін асырыпты. «Биыл «Жанерке» ансамблінің құрылғанына 10 жыл толады. Соған орай осы сайыста бақ сынамақ болып, көп еңбектеніп, ұзақ дайындалдық. Намысты қолдан бермеу үшін барымызды салдық. Еңбегіміз ақталып, жеңіс тұғырынан көріндік. Бұл – біз үшін үлкен қуаныш, абырой. Осы жобаға қатысуымызға мүмкіндік жасап, демеуші болған «Ақбай» шаруа қожалығының жетекшісі С.Абылғожинаға, кәсіпкер Жеңіс Әміреновке, «Сайхан» ЖШС жетекшісі В.Дудникке, Зайсан аудандық ішкі саясат бөлімінің басшысы З.Дүйсенбаеваға ерекше алғысымызды жеткізгіміз келеді», дейді «Жанерке» әжелер ансамблінің жетекшісі Қалима Исаева.
Реті келгенде айта кетейік, ұлттық өнерімізді ұлықтау, дәстүрлерімізді дәріптеу мақсатында ұйымдастырылған байқау белгілі журналист Гүлмира Нәлібай мен «Мереке» продюсерлік орталығының ұйымдастыруымен биыл алғаш рет өткізіліп отыр.
Азамат ҚАСЫМ,
«Егемен Қазақстан»
Шығыс Қазақстан облысы,
Зайсан ауданы
