Жиынға Қазақстан Республикасының Мәдениет және спорт министрі Арыстанбек Мұхамедиұлы, Халықаралық қазақ күресі федерациясының президенті Қанат Бозымбаев, «Қазақстан Барысы» қазақ күресін дамыту қорының төрағасы Арман Шораев қатысты.
7-8 мамыр күндері Алматыдағы халықаралық шаңғы трамплиндері кешенінің аренасында «Халық Барысы» республикалық турнирі өтеді. Жарыс ресми түрде тіркелген белдесу ұлттық жекпе-жек түрі бойынша ұйымдастырылады. 7 мамыр күні ашылу салтанаты және мерекелік шоу концерт болса, 8 мамыр күні балуандар алаңға шығады.
«Халық Барысы» – Халықаралық қазақ күресі федерациясы, «Қазақстан Барысы» қазақ күресін дамыту қоры және Алматы қаласы әкімдігінің бірлескен жобасы.
«Елбасы Нұрсұлтан Назарбаев өзінің «Болашаққа бағдар: рухани жаңғыру» атты мақаласында: «Жаңғыру атаулы бұрынғыдай тарихи тәжірибе мен ұлттық дәстүрлерге шекеден қарамауға тиіс. Керісінше, замана сынынан сүрінбей өткен озық дәстүрлерді табысты жаңғырудың маңызды алғышарттарына айналдыра білу қажет. Егер жаңғыру елдің ұлттық-рухани тамырынан нәр ала алмаса, ол адасуға бастайды» деп айтқан болатын. Осыған сүйене отырып, біз ата-бабамыздан мұра болып қалған белдесуді заманға сай етіп халыққа ұсынбақпыз», деді Халықаралық қазақ күресі федерациясының президенті Қанат Бозымбаев өз сөзінде.
Жарыстың жүлде қоры 20 миллион теңгеге жуық. Турнирге Қазақстанның барлық аймағынан әуесқой 1000-нан аса балуан қатысады деп күтілуде.
Рауан ҚАЙДАР,
«Егемен Қазақстан»
