Бір ғажабы, Жұмаділхан бұл салада арнайы білім алмаған. Бүкіл саналы ғұмырын ғылымға арнады. Атап айтсақ, Қазақ ауылшаруашылық институтының агрономия факультетін үздік бітірген ол мамандығы бойынша біраз уақыт Жамбыл облысының Жуалы ауданында жұмыс істеді. Қазіргі кезде Қазақ ұлттық аграрлық университетінде «Экология» кафедрасының аға оқытушысы. Керімбек Түркиядағы Сельжук университетінде білімін жетілдіріп, жаратылыстану ғылымдарының философия докторы (PhD) атанды.
– Жас ұрпаққа аграрлық білім беру бағытында ұстаздық жолды таңдап, ғылыммен айналысып жүрген Жұмаділхан Сарыбайұлы – бойындағы суретшілік дарынымен көпшілікті таңғалдырып келе жатқан қылқалам шебері. Шығармашылық жұмыстары кәсіби суретшілердің туындыларынан еш кем соқпайтын табиғи талант иесі университет қабырғасындағы жеке көрмесіне отыздан астам таңдаулы еңбектерін қойған. Суретші туындыларының тақырыбы әр алуан. Автордың «Ауылда», «Терезедегі таң», «Әкемнің портреті», «Бұлақ басында», «Тыныштық», «Дала» сынды картиналары зер салып қараған кез келген адамды сүйсіндірмей қоймайды, – дейді ақын Алмат Исәділ.
100-ден астам көркемсурет туындыларының авторы Жұмаділхан Керімбек бірнеше республикалық және қалалық көрмелерге қатысты. Өнер иесінің бірнеше графикалық жұмыстары Түркия, Беларусь елдерінде танылып, майлы бояумен салынған суреттері еліміздегі өнерсүйер қауым мен жеке коллекционерлер тарапынан жоғары бағаланды.
Ғалым СҮЛЕЙМЕН,
«Егемен Қазақстан»
АЛМАТЫ
