Байқау шымылдығы аға сұлтан Ерденнің баласы Баймендеден айырылып қайғы жұтқан бақытсыз шағын баяндайтын сахналық қойылыммен ашылды. Бұдан кейін сахна төріне Сәтбаев қаласының әкімі Асқар Ыдырысов көтеріліп, байқауға қатысушылар мен көрерменге құттықтау сөз арнады.
– Бұл аспаптар – ұлтымыздың тарихи-этностық мәдениетінің көнермес көзі, рухани қазынасы, баға жетпес мүлкі. Жаһандану аранына жұтылып кетпес үшін жан дүниемізді жадыратып, рухымызды дүр сілкіндіретін осындай байқауларды ұйымдастыру – қасиетті борышымыз. Елбасының «Рухани жаңғыру» бағдарламасы тереңге тамыр жіберген қасиетті ұлттық кодымызды санамызда қайыра жаңғыртуға үндеп отыр. Түпкі мақсат, басты меже осы, – деп түйіндеді сөзін қала басшысы.
Байқаудың салтанатты ашылу рәсімінде көрермен қауым жергілікті өнер мектебінің ұлт-аспаптар тобы мен Қарағандыдан арнайы келген «Арқа ажары» фольклорлық ансамблінің концерттік бағдарламасын тамашалады. Бұған қоса өңірге белгілі жезтаңдай әнші Құрмаш Ыбышевтың әндеріне құлақ құрышын қандырды.
Байқауға қатысушы үміткерлердің аспапта орындау шеберліктерін Қазақстанның еңбек сіңірген қайраткері Ермұрат Үсенов бастаған қазылар алқасы таразылады.
Байқаудың екінші күні өткен іріктеу кезеңінде еліміздің әр аймағынан келген өнерпаздар өзара сынға түсті. Қазылар алқасы алғашқы кезеңде бақ сынаған 34 қатысушының арасынан екінші кезеңге 14 өнерпазды іріктеп шығарды.
Байқаудың үшінші күнінде қазылар мен көрерменнің көңілінен шығып, оза шапқан өнерпаздардың есімдері анықталды. Тартысты өткен өнер сайысының І орынға тағайындалған әрқайсысы 200 мың теңге болатын екі жүлдесі алматылық Мариям Үсен мен Солтүстік Қазақстан облысының өкілі Айдос Ақылбековке бұйырды.
Ал бас жүлдеге Астана қаласынан келген өнерпаз Фариза Қосшығұлова лайықты деп танылды. Сананы жаңғыртқан өнер сайысының жеңімпазы арнайы дипломмен және 400 мың теңгенің сертификатымен марапатталды.
Қайрат ӘБІЛДА,
«Егемен Қазақстан»
Қарағанды облысы,
Сәтбаев қаласы
Суретті түсірген Меруерт НАУРЫЗБАЕВА
