Бұл – Қазақстан халқы үшін ең маңызды мерекелердің бірі. Ол – ел ішіндегі түрлі этнос пен дін өкілдерінің бір-біріне деген сый-құрметін арттырып, татулықты, бірлікті, ортақ құндылықтарды насихаттауды мақсат тұтқан аяулы мейрам.
Жыл сайын аталған мерекеде Қазақстан аумағында тұрып жатқан 130-дан астам этностың өкілдері киелі қара шаңырақта тату-тәтті, береке мен бірлікте, бейбітшілік пен ынтымақта өмір сүріп жатқандығын тойлайды. Еліміздегі этностарды бұрынғыдан да жақындастыру үшін бүкіл Қазақстанда жаппай патриоттық шерулер өтеді. Татулық пен бейбітшілік мерекесін еліміздегі 29 республикалық, 75 аймақтық және 530 жергілікті этномәдени бірлестіктердің мүшелері асыға күтеді. Сондай-ақ осынау мереке қарсаңында Қазақстан халқы Ассамблеясының қызметі, қоғамдағы рөлінің маңыздылығы жарқырай көрінеді.
Елбасы Жарлығымен 1995 жылғы 1 наурызда Президент жанындағы консультативті-кеңесші орган ретінде құрылған Қазақстан халқы Ассамблеясының ел үшін игілікті болғандығына бүгінде әркімнің-ақ көзі жетті.
Президентіміз Ассамблея құру идеясын алғаш рет 1992 жылы Қазақстан халқының бірінші форумында жариялады. Мұндай институтты құру қажеттілігі саяси, сондай-ақ жаңадан құрылған, тәуелсіз, полиэтносты, поликонфессиялы мемлекеттің тұрақты дамуы тұрғысынан туындаған болатын.
Аталған бастама мәдениетаралық диалогті нығайтудың жаңа кезеңінің негізін қалап, этносаралық қатынастарды дамыту мәселелерін жоғары деңгейде шешуге мүмкіндік жасайтын әлемдік тәжірибедегі тың бағыт болды. Жиырма үш жылдық тарихында Ассамблея қарқынды дамып, елеулі өзгерістерді бастан кешірді. Оның дамуы барысында этносаралық толеранттылық және қоғамдық келісімнің қазақстандық үлгісі қалыптасты. Осы жылдар ішінде Қазақстан халқы Ассамблеясының институттық құрылымы нығайып, қоғамды ұйыстырушы әлеуеті толысты, ол халық дипломатиясының маңызды күретамырына айналды.
Қазақстан халқы Ассамблеясының өміршеңдігін еліміздегі барлық ұлт пен ұлыстың мүдделерін бір арнаға тоғыстырып, олардың этностық, діни ерекшеліктеріне қарамастан, құқықтары мен бостандықтарын қорғаушы бірегей институтқа айналғандығынан байқауға болады.
Сондай-ақ 2007 жылдан бастап Қазақстан халқы Ассамблеясы атынан Мәжіліске 9 депутаттан сайланып, олар заң шығарушы органда елімізді мекендеген барлық этностардың мүдделеріне сай қызмет атқаруда. Бүгінде біздер қоғамдық келісім мен бірліктің сақталуын, ұлт мәселесінің саясиланбауын, эктремизм мен радикализмді болдырмауға байланысты бастамалар көтеріп, аталған мәселенің Парламентте қабылданатын заңдарда ескерілуіне ықпал етудеміз.
Осынау сәтте қоғамды ортақ мүддеге жұмылдыратын, тұрақтылық пен бейбітшіліктің кепілі ретінде мемлекеттік тіл мен қазақ ұлты екенін әсте естен шығармаған абзал.
Ел бірлігінің нығаюына сүбелі үлесі қосып отырған Ассамблеяны қоғамдық келісімнің маңызды тетігі ретінде қарастыруға болады. Ал халықты біртұтас идея, ортақ мүддеге жұмылдыратын бағыт ретінде Елбасы ұсынған «Мәңгілік Ел» идеясын атап өтуге болады.
«Кезінде тағдырдың жазуымен қасиетті қазақ даласына түрлі этнос өкілдері қоныс тепті. Бүгінге олар тегі басқа болғанымен теңдігі бір, қаны бөлек болғанымен жаны бір, арманы ортақ біртұтас халыққа айналды.
Туған елінің туының астында бірігіп, туған жердің тұғырын биік етуге бел шешкен азаматтарды бір тағдыр күтеді әр уақытта. Осылай елдігіміздің ертеңі ошақтың үштағаны секілді «бір халық, бір ел, бір тағдыр» деген үш сөзге сыйып отыр», деді Президентіміз. Елбасының осы екі ауыз сөзіндегі біріктіруші ұғымды әрбір қазақстандық біліп жүргені дұрыс.
Жыр алыбы Жамбыл бабаның «Жігерлі болса – ер болар, бірлікті болса – ел болар» деген даналық сөзі бар. Шындығында, ел бірлігі болмаса онда экономика мен әлеуметтік даму тұрмақ тәуелсіздік пен тұғырлылық туралы да сөз айтуға шама жетпес еді.
Ассамблеяны құрудағы Елбасының алдына қойған мақсаты не еді? Ол – Қазақстан Республикасында қазақ ұлтының біріктіруші рөлі арқылы халқымыздың азаматтық және рухани-мәдени тұтастығы негізінде қазақстандық бірегейлікті және бәсекеге қабілетті ұлт қалыптастыру үдерісінде этносаралық татулықты қамтамасыз ету.
Ел бірлігі – мемлекеттілік негізі. Қоғамдық бірлікті ту етіп ұстау арқылы ғана біз алдымызға баянды ұлы мақсаттар қоя аламыз. Біздің әрбіріміз, мейлі өндірісші болайық, диқан болайық, депутат болайық, көп этносты Қазақстан халқын бір атаның балаларындай еліміздің өркениетті дамуы жолындағы игілікті іске жұмылдырып, ортақ мақсатқа ұйыстырып, елімізде тұрақтылықты сақтау мен оның дамуына өз үлесімізді қосуға тиіспіз.
Еліміздің әр аймағында құрылған 29 Достық үйі этномәдени бірлестіктердің мәдени және әдістемелік орталығына айналып, бірлік пен этносаралық татулықты насихаттап, қазақстандықтарды отансүйгіштікке, ұлттық бірлікке тәрбиелейтін органға айналды.
Биыл этномәдени бірлестіктердің жастар қанатының жетекшілері Қазақстан халқы Ассамблеясының «Жаңғыру жолы» атты республикалық жастар қозғалысын құру туралы шешім қабылдады. Бұл Ассамблея жастарының бірлестігі елдің тұрақтылығы мен бейбітшілігіне бағытталған шаралардан тысқары қалмай, бұрынғыдан да белсене үлес қосатындығын көрсетсе керек.
1 мамыр мерекесінің негізгі идеясы – бірлік болса, түрлі ұлт өкілдерінің ынтымағы, тату-тәтті тіршілігі әлемге үлгі болып отыр.
Қазақ халқының аяулы тұлғаларының бірі Әнет баба: «Ынтымақта болсаңдар еш жау ала алмайды», деген. Ауызбірліксіз ешкімнің де, ешбір елдің де ешқашан асығы алшысынан түспеген. Осы ретте қазақтың тағы бір бірегей қасиеті ретінде ешкімнің ала жібін аттамауын, көрші-көлем, ағайын-жұртпен, алыс-жақынмен тату-тәтті, сыйлас болуын айтуға болады.
Күрес – өмір заңы болса, ал бірлескен күш-жігер, тонның ішкі бауындай жымдасқан бірлік пен өзара ілтипат, бауырмалдық пен достық сынды киелі ұғым-сезімдер ерлікке де, жеңіске де, сән-салтанатқа бастайды. Ішкі бірлігі болмаған талай құдіретті империялар мен мемлекеттер, халықтар мен тайпалар тарихтың алмағайып тұстарында құрдымға кетті.
Сындарлы сыртқы саясатымызды ұстана отырып, еліміздің ішкі әлемінде де алауыздыққа жол бермеу, ұлтаралық келісім мен діни ымыра, азаматтық келісім арқылы тәуелсіз Қазақ елінің баянды болашаққа жол тартқан ұлы сапарын бекемдей түсу – міндетіміз.
Бірлік пен татулық тәлімінің қазіргі көпэтносты Қазақстан жағдайында маңызы ерекше. Мемлекет құраушы, елдің, жердің иесі ретінде қазақ халқы өзге ұлттар мен ұлыстарға татулықтың асқан үлгісін көрсетіп келеді десек, артық айтқандық емес. Қиын-қыстау кезеңге тап болған өзге ұлт өкілдеріне қазақ халқы қашанда қамқор болып, ағалық мейірімін аямаған. Сол үшін көптеген ұлыстардың бүгінгі буыны қазақ халқына шексіз риза.
Наталья ЖҰМАДІЛДАЕВА,
Парламент Мәжілісінің депутаты
