Кездесу барысында Ауғанстан басшысы қазақстандық тарапқа және Президент Нұрсұлтан Назарбаевтың жеке өзіне Ауғанстанды қайта қалпына келтіруге, елде бейбітшілік пен қауіпсіздік орнатуға бағытталған барлық халықаралық және өңірлік бастамаларға үнемі көрсетіп отырған қолдауы үшін алғысын білдірді. Ол Кабул үшін Қазақстанның Орталық Азиядағы ең ірі әріптес ретінде ерекше маңыздылығын атап өтті. Бұған оның тек 2017 жылы Астанаға екі рет сапармен келуі және Қазақстан Президентімен келіссөздері дәлел.
Ауғанстан Президенті екі ел арасындағы сауда-экономикалық ынтымақтастықты тереңдетудің қажеттігін басып айтты. Қазақстандық кәсіпкерлерді ауған нарығына бидай жеткізу, Ауғанстан аумағында диірмен салу, кен өнеркәсібі, электр энергиясы, теміржол салаларында жобаларды жүзеге асыру бойынша белсенді іс-қимылға шақырды. Өз кезегінде, ауған тарабы Қазақстан нарығына жеміс-жидек пен жаңғақ түрлерін жеткізу көлемін ұлғайтуға әзір.
Ә.Есенгелдиев Ауғанстан Президентіне қонақжайлығы үшін алғыс білдіріп, Елбасы Н.Назарбаевтың Ауғанстанға назарын, соның ішінде Қазақстанның БҰҰ Қауіпсіздік Кеңесіндегі тұрақты емес мүшелігі шеңберінде айрықша маңыз беріп отырғанын атап айтты. Елші мемлекеттер арасындағы екіжақты қатынастарды одан әрі кеңейтуге күш салуға дайын екенін жеткізіп, сондай-ақ Каулдың елдегі жағдайды қысқа мерзімде қалпына келтіру ісін одан әрі қолдайтыны жөніндегі Астананың ұстанымы туралы мәлімдеді.
Бұдан бөлек, Қазақстан елшісі сол күні Ауғанстанның Сыртқы істер министрі Салахуддин Раббанимен жеке кездесу өткізіп, тараптар екіжақты және көпжақты ынтымақтастығының кең ауқымды мәселелері бойынша пікір алмасты.
«Егемен-ақпарат»
