Фото: Рафхат ХАЛЕЛОВ
Әуезов театрының жыл сайынғы дәстүрлі жазғы гастролі биыл Батыс Қазақстан облысынан басталды. Ғасырға жуық тарихы бар театрдың Д.Темірсұлтанова, Д.Ақмолда, А.Сатыбалды секілді танымал өнерпаздары И.Сапарбайдың «Сыған серенадасы», М.Омарованың «Ақтастағы Ахико», Р.Отарбаевтың «Бейбарыс сұлтан», Ғ.Есімнің «Таңсұлу», А.Володиннің (аударған А.Маемиров) «Қоштасқым келмейді...» қойылымдарын сахналады.
Бір ерекшелігі, бұл жолы Әуезов театры өздерінің музей қорынан қызықты жәдігерлер әкеліп, көшпелі көрме де ұйымдастырды. Жарты ғасырлық тарихы бар театр музейінде алғашқы театр әртістерінің киімдері мен фотосуреттері, афишалары, бағдарламалары, өмірден озған театр әртістерінің өмірбаяндары, жеке материалдары, қолжазбалары, алған сыйлықтары сақталған. Театр музейінің жетекшісі Наргиз Асанжанова оралдықтарға әрбір жәдігердің тарихын әсерлі әңгімелеп берді.
– «Рухани жаңғыру» бағдарламасы аясында театр гастролі өңірлерде бұдан былай да жалғасады. Бұған қоса біз биыл Францияда өтетін дүниежүзілік «Авенью» театр фестиваліне Қазақстаннан тұңғыш рет қатысайын деп отырмыз. Біз бұл додаға ақын-драматург, Мемлекеттік сыйлықтың лауреаты Иран-Ғайыптың (Иранбек Оразбаев) «Қорқыт» драмасын әзірлеп жатырмыз, – дейді өнер ұжымының болашақ жоспарларымен бөліскен театр директоры, Қазақстанның еңбек сіңірген қайраткері Асхат Маемиров.
Әкемтеатрдың гастрольдік сапары жексенбі күні Р.Отарбаевтың «Бейбарыс сұлтан» тарих драма қойылымымен аяқталды. Бейбарыс сұлтанның бейнесін актер Азамат Сатыбалды ойнады. Қорытынды кешке Қазақстанның Еңбек Ері, КСРО халық әртісі, КСРО, ҚазКСР Мемлекеттік сыйлықтарының лауреаты Асанәлі Әшімов, Халық әртісі Есмұқан Обаев қатысып, тілек білдірді. Театр директоры Асхат Маемиров әр қойылымды құшақ жая қарсы алған көрермен қауымға, театр әртістерін арнайы қабылдап, құрмет көрсеткен облыс басшыларына алғысын айтты.
Әуезов театрының гастролі Қостанай облысында, Арқалық қаласында жалғаспақ.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ
