Редакцияның жанынан құрылған «Егемен» баспасы соңғы екі жылдың орайында бірер кітап шығарып үлгерді. Тәуелсіздік тойы қарсаңында ол кітаптар сериясы «Тәуелсіздік» атты көлемді жинақпен толыға түсті. Бүгін, Астанадағы академиялық кітапханада баспахана бояуы да кеуіп үлгермеген тың туындының тұсаукесері өтеді. Кітапқа «Егемен Қазақстан» республикалық газеті» акционерлік қоғамының президенті Сауытбек АБДРАХМАНОВ жазған алғысөзді оқырман назарына ұсынып отырмыз.
«Егемен» баспасының кезекті кітабы «Тәуелсіздік» аталады. Бұған дейін, 2010 жылы Президент Н.Ә.Назарбаев жайындағы жарияланымдардан «Елбасы» жинағын, одан кейін, 2011 жылдың басында еліміздің Еуропа төріне көтеріліп, кәрі құрлыққа төбебилік еткен мерей биігі жөніндегі мақала, репортаж, сұхбаттардан «Салтанат» кітабын құрастырған болатынбыз. Бұл жинаққа өткен жиырма жылда бас басылым бетінде Тәуелсіздіктің қадір-қасиеті, тәуекелге толы тағылымды тарихы, жеңістер мен жемістерге толы жасампаздық жолы жайында жазылып, жарық көрген материалдар топтастырылды. Осы арқылы ел газеті қазақ тіліндегі саяси журналистиканың тұңғыш трилогиясын оқырман назарына ұсынып отыр деп те айта аламыз.
Тәуелсіздік... Мына дүниеде 2500-ден астам халық бар екен. Соның екі жүзге жуығы ғана өзінің мемлекеттілігіне ие екен. Саны жағынан қазақты сан орап кететін ұлттардың арасында да өз елі өзіне өлең төсегі болмай, туған жерінен бір жапырақ туын тігетін алақандай төбе таппай жүргендері жетерлік. Тіпті туған жерге туын тіккен елдердің бәрін бірдей толық мағынасында тәуелсіз деп тани алмайтынымыз тағы бар.
Бұл биікке ел тәуелсіздікті жариялаумен, гимнді, гербті, туды белгілеумен, тіпті Біріккен Ұлттар Ұйымының мүшелігіне өтумен де бірден жете қалмайды. Тәуелсіздік ұғымының аясы кең. Әлемдік қауымдастық мойындаған өз аумағы болуы да, сол аумақты басқаратын мемлекеттік биліктің болуы да бұл үшін аздық етеді. Тәуелсіздік ең алдымен мемлекеттің өз саясатын өз еркімен жүргізуге қабілеттілігін білдіреді. Күніңді зорға көріп, көршілеріңнен көмек сұрап, барар жеріңе бара алмай, айтар сөзіңді айта алмай, жан-жағыңа жалтақтап жүрсең қанша жерден атың тәуелсіз болса да затың тәуелді елсің деген сөз.
Шүкіршілік, артта қалған жиырма жылдың алғашқы белестерінен-ақ Қазақстан Республикасы толық тәуелсіздікке жетудің жолына түсті, небір тайғақ кешулерден аман-есен өтіп, азаттықтың алғашқы әрі азап, әрі ғажап асуларынан абыроймен асты, айналасы оншақты жылдың жүзінде егемен ел ретінде дамудың даңғылына қарай қадам басты. Одан кейінгі онжылдықта қазір бүкіл әлем «Қазақстан жолы» деп ат қойып, айдар таққан шын мәнінде феномен құбылысты дүниеге әкелді. Бүгінде біздің еліміз экономикадағы ішкі жалпы өнімнің өсу қарқыны жөнінен әлемдегі ең алдыңғы көрсеткіштердің біріне қол жеткізіп отыр. Бір сөйлеммен айтыла салған осы жайдың астарына көз жіберсек, тарих сағатының тілі сырт ете қалғандай қысқа кезеңде кешегі кеңестік империяның шет аймағы, шикізаттық шылауы ретінде келген республикадан экономикасы қуатты, саясаты тұрақты, сүйегі мығым мемлекетке, сөздің толық мағынасындағы еңселі елге, ел болғанда да алыс та, жақын да мойындайтын, Батыс та, Шығыс та бірдей сыйлайтын елге, көп дінді, көп тілді, бірақ бір ділді елге айналудың қандайлық қиындығын сергек сана сезінбей қоймайды. Осының бәріне ең алдымен табиғатынан кең жаратылған, мол пішілген халқымыздың, сол халыққа дана басшылық жасай білген Елбасымыздың – халқымыздың бағына туған перзент, еліміздің Тұңғыш Президенті Нұрсұлтан Назарбаевтың арқасында қол жетіп отырғаны шығар күндей шындық.
Кітапта басы қосылған дүниелер Қазақстанның осы жиырма жылдағы жүріп өткен жолы атқан оқтай түзу, төселген тақтайдай тегіс болмағанын, жас мемлекеттің алдынан талай-талай сынақтар тосылғанын, оларды еңсеру елдің елінің, ердің ерінің қолынан келетінін көрсетеді. Қазақ елінің де, елді басқарған ердің де қолынан келді сол шаруа. Осы жиырма жылдың ішінде даламыз да өзгерді, қаламыз да өзгерді. Олай болатыны – бәрінен бұрын біздің санамыз өзгерді. Ата-бабаларымыз аңсап, армандап өткен азаттыққа арпалысқа толы жасампаз жұмыс қана апаратынын, тәуелсіздікке тәуекелі тұратындардың ғана қолы жететінін айқын ұғынған бостан сана ол. Тәуелсіздіктің басқа бір қонса мәңгілікке шегеленіп қалмайтынын, баянды бостандық бақыттың бағасын білгендердің ғана қолында тұратынын да біледі біздің халқымыз. Бар адамзат бір базарда бәсекелесіп, барын салып, бағын сынап жатқан мына жаһанданудың жанталасты жағдайында ұлт ретінде ұпайыңды жоғалтпау, халық қалпыңда қадіріңді кетірмеу, мемлекет күйінде мығым тұру барған сайын қиындай түсетінін де біледі біздің халқымыз.
Бұл кітап шын мәнінде Тәуелсіздік толғауы. Оны оқи отырып, сіз бен біз ата-бабалар аманатын ақтаған ұрпақ екенімізге мақтанамыз, сіз бен біздің мына жердің бетіне келген кезіміз халқымыздың тарихындағы ең бір ғажайып тұсқа – азаттық алған, тәуелсіз мемлекет құрған тұсқа тап болғанына, біздің маңдайымызға осы елдің кірпішін қалау бақыты бұйырғанына шүкіршілік етеміз, оны оқи отырып, келер ұрпақ өздеріне Елбасы бастап, елі қостап құрып берген Қазақстанның қадір-қасиетін тани түседі, тәуелсіздік туын желбіретіп ұстаудың жауапкершілігін сезіне түседі.
Ел газеті «Егемен Қазақстан» баршаңызға Тәуелсіздігіміздің ұлы тойы тұсында осы кітапты тарту етеді, ардақты ағайын.
Торқалы тойымыз құтты болсын!