Кеше Орталық сайлау комиссиясы Жалпыұлттық социал-демократиялық партиясының (ЖСДП) Қазақстан Республикасы Парламенті Мәжілісінің депутаттығына 54 кандидат енгізілген партиялық тізімін тіркеді.
ЖСДП-ның тіркелген партиялық тізіміндегі кандидаттардың құрамында бес ұлттың өкілі бар. Олардың 25 пайызын әйелдер құрайды. Тізімге енгізілген кандидаттардың 40 пайызы жасы 55-ке дейінгілер. Ал ең жас үміткердің жасы – 25-те. Білімдеріне келсек, кандидаттардың 96 пайызы жоғары білімді. Олардың үштен біріне жуығының мамандықтары заңгер және экономист болып келеді. Үміткерлердің 25 пайыздан астамы түрлі халық шаруашылығы салаларының мамандары.
Жалпыұлттық социал-демократиялық партиясынан ұсынылған кандидаттардың жартысынан көбі партиялық құрылымдардың немесе басқа да қоғамдық ұйымдардың қызметкерлері болып табылады. Атап айтқанда, 18 пайызы коммерциялық ұйымдарда, 7,5 пайызы ғылым, мәдениет және білім салаларында жұмыс істейді.
Орталық сайлау комиссиясының төрағасы Қуандық Тұрғанқұловтың хабардар етуінше, 9 желтоқсан күнгі жағдай бойынша мәслихаттар депутаттарының сайлауына барлығы 4500 кандидат ұсынылған. Олардың ішінде облыстық, Астана мен Алматы қалалық мәслихаттарға ұсынылған 407, аудандық мәслихаттарға – 3392, қалалық мәслихаттарға – 701 кандидат бар. Кешегі күнге дейін мәслихаттар депутаттығына 63 кандидат тіркелген.
Әлисұлтан ҚҰЛАНБАЙ.