Астана қаласының әкімдігі «Рухани жаңғыру» бағдарламасы аясында елордада қоғамдық сананы жаңғыртуға қажетті барлық жұмыстарды белсенді түрде жүргізіп отыр. Қоғамдық сананы жаңғыртуға байланысты Елбасы айтқан 6 негізгі ұсыныс бар. Олар: бәсекеге қабілеттілік, прагматизм, ұлттық бірегейлікті сақтау, білімнің салтанат құруы, Қазақстанның революциялық емес, эволюциялық дамуы және сананың ашықтығы. Біздің жүйелі жұмысымыз осы 6 бағытқа негізделген. Қазір «Атамекен», «Рухани қазына», «Тәрбие және білім», «Ақпарат толқыны» кіші бағдарламалары бекітіліп, іске асырыла бастады.
Айта кететін тағы бір жайт, Елбасы Н.Назарбаев өзінің мақаласында: «Болашақта ұлттың табысты болуы, адамдарының бәсекеге қабілеттілігімен айқындалады», деген болатын. Сондықтан әрбір азаматымыз осы заманға лайықты қасиеттерге ие болуы керек. Ол үшін бірінші кезекте білімге үлкен көңіл бөлу қажет. 2050 жылға қарай халқымыздың 70 пайызы қалаларда тұрады деп күтілуде.
Сонымен қатар жылдан жылға қазақ тілді мамандарға сұраныс арта береді. Оны қазірдің өзінде байқауға болады. Сондықтан біз бүгіннің өзінде оқыту процесін 46 пайыздан 65 пайызға дейін қазақ тілінде жүргізу және жаңа мамандықтарға оқытуды қолға алып отырмыз. Олардың ішінде техникалық қызметтер және медициналық техникалар жөндеу, медициналық оптика, фармацевтика және т.б мамандықтар бар. Біздің мақсатымыз – тұрғындарды бәсекеге қабілетті қылу, жоғары деңгейлі табыспен қамтамасыз ету», деді қала басшысы.
Ол сондай-ақ Астанада жастар арасында спортты насихаттауға ерекше көңіл бөлініп отырғанын алға тартып, салынған нысандарға сараптама жасады. «Мысалы, өткен жылы меценаттардың қолдауымен №59 мектеп-лицейі жанынан жаңа футбол алаңы салынды. Жобаның құны – 120 млн теңге. Сондай-ақ былтыр «Нұрал» балаларды дамыту орталығы ашылды. Аталған нысанды салуға 80 млн теңге жекеменшік инвестиция салынды. Орталықта 8 спорт түріне арналған секциялар қарастырылған. Бұл жерде кәсіби спортшылармен бірге әлеуметтік тұрмысы төмен отбасылардың балалары, басқа да спортты жандарына серік еткен адамдар жаттығу жасай алады», деді Ә.Өрентайұлы.
Жиын барысында Астана қаласының әкімі «Рухани қазына» кіші бағдарламасы шеңберінде Қазақстан халқының мәдени мұраларын насихаттауға, жаңғыртуға, патриотизмді қалыптастыруға, Отанды сүюге үндейтін 17 жоба іске асырылғанын тілге тиек етті. Осы орайда сарапшылармен бірлесіп 44 аса маңызды тарихи жәдігерлерді қайта қалпына келтірген арнайы жоба жүзеге асқан. Ол жәдігерлердің ішінде Сәкен Сейфуллиннің жеке заттары мен «Алжир» музейі мемориалдық кешенінің экспонаттары бар.
Сонымен қатар қала әкімі елорданың мәдени өміріне де шолу жасап, тың жаңалықтармен бөлісті. ЭКСПО алаңында жаңа сатира және әзіл театрының ашылуы болады. Аталған театрдың көркемдік жетекшісі – Тұрсынбек Қабатов. Және де Елбасының тапсырмасымен, «Рухани жаңғыру» бағдарламасының аясында Астана қаласында Қазақ драма театрының жаңа ғимараты бой көтереді. Қазіргі уақытта Мәдениет және спорт министрлігімен бірге осы бағытта жұмыстар жүргізіліп жатыр. Бұдан бөлек, қасиетті орындарды сақтау мақсатында бірқатар тарихи және мәдени нысандарға реставрация жұмыстары жүргізілді. Олар – «Бәйтерек» монументі, Орыс академиялық драма театрының ғимараты, «Атамекен» этномемориалдық кешені. Өткен жылы бұл нысандарды аралаған қонақтардың саны 600 мыңнан асты. Соның арқасында елордаға келушілер Қазақстанның тарихы мен тәуелсіз еліміздің даму кезеңдерімен, жетістіктерімен жете танысты», деді Ә.Исекешев.
Рауан ҚАЙДАР,
«Егемен Қазақстан»
