Кеше Мемлекет басшысы Нұрсұлтан Назарбаев Астана қаласында «Тұлпар-Тальго» жолаушылар вагондарын шығаратын алғашқы зауыттың салтанатты ашылу рәсіміне қатысты, деп хабарлады Қазақстан Республикасы Президентінің баспасөз қызметі.
![091211-39](http://old.egemen.kz/2011img/091211-39.jpg)
Мемлекет басшысы вагондардың аспалы жабдықтау монтаждық учаскесінде болып, ішкі жабдықтар мен интерьерді құрастыру учаскесіне арналған өндірістік үдерістермен, қосымша тіркеу және статистикалық сынақ цехымен танысты, сондай-ақ бір жолаушы вагонын көріп шықты. «Қазақстан темір жолы» ҰК» АҚ президенті А.Мамин Нұрсұлтан Назарбаевқа зауыттың негізгі техникалық сипаттары, жолаушылар қозғалысының жылдамдығын шектеу мен дамыту жоспары туралы баяндады.
Зауытты аралау кезінде Мемлекет басшысы зауыттағы статистикалық стендтік сынақтар өткізу цехын іске қосты.
Нұрсұлтан Назарбаев зауыттың жұмысшыларымен әңгімелесті.
– Индустриялық бағдарламаны іске асыру еліміздің таяу жылдардағы басым міндеттері болып табылады. «Тұлпар-Тальго» зауыты – Тәуелсіздік күніне тамаша сыйлық. 2015 жылы жергілікті өнім Қазақстан бойынша пайдаланылатын болады. Біздің көлік жүйесі жұмысының тиімділігі едәуір артады, – деді Мемлекет басшысы.
Жаңа зауыт құрылысының жобасы испаниялық серіктестермен бірлесіп жүзеге асырылған. Оның жобалық қуаты – жылына 150 жолаушы вагонын шығару. Жобаның құны: 8,8 млрд. теңге. Зауытта 18, 12, 10 орындық вагондар, сондай-ақ мүгедек жолаушылар үшін 6 орындық вагондар шығарылатын болады. Вагонның орташы құны – 780 мың еуро. Вагондар Қазақстанның климаттық жағдайына бейімделіп жасалады, олардың конструкциялық жылдамдығы сағатына 350 шақырымды құрайды.
Технологиялық үдеріске қозғалмалы бөлшектерін құрастыру, ауа және электрмен жабдықтау жүйесін қосу, купе элементтерін дайындау, қорабын дәнекерлеу және сырлау, жабдықтардың жекелеген түрлерін дайындау және монтаждау жатады. Техникалық қадағалауды еуростандарттардың талаптарының орындалуына бақылау жасайтын испан тарабы жүзеге асырады. Сондай-ақ зауыттың жұмысшылары Испанияның зауыттарында оқып келген. Аталған жобаны іске асыру жолаушылар вагондарына тапшылық мәселесін шешуге, пойыздар қозғалысындағы қауіпсіздік деңгейі мен жолаушылар қолайлылығын арттыруға, қазақстандық темір жол көлігінің бәсекеге қабілеттілігін ұлғайтуға мүмкіндіктер туғызады. Сондай-ақ жаңа жолаушылар вагондарын құрастыру кезінде жекелеген түйіні мен бөлшектерін дайындауға арналған тапсырыстарды орналастыру есебінен бірқатар өнеркәсіп кәсіпорындары өндірісінің көлемі ұлғайтылатын болады.
-----------------------------------------
Суреттерді түсіргендер С.БОНДАРЕНКО, Б.ОТАРБАЕВ.