Теңгенің әлсіреуіне қатысты өткен аптаның соңында Ұлттық банк төрағасы Данияр Ақышевтің түсініктеме бергенін айта кетейік. Оның айтуынша, халықтың шетелге демалысқа бару маусымы сұраныстың көтерілуіне ықпал еткен факторлардың бірі деуге болады. Қолма-қол ақшаны теңгеден АҚШ долларына айырбастау осы мезгілде көбейеді. Теңгенің бағамына кері әсер еткен басқа да себептер бар.
– Дамушы нарықтардың валюталарына қатысты АҚШ долларының нығаюы және АҚШ-тың Федералдық Резервінің пайыздық мөлшерлемелерінің ұлғаюы теңгенің АҚШ долларына бағамының ықпал еткен факторлардың бірі болып табылады, – деп түсіндірді Д. Ақышев.
Ол Қазақстанның негізгі сауда әріптесі – Ресейге салынған санкциялар капиталдың Ресейден әкетілуін күшейткендігін атап өтті. АҚШ-тың санкциялары рубль бағамының әлсіреуіне әкеліп соқтырды, ал бұл теңге бағамын қалыптастыру факторларының бірі.
«Астана» ХҚО: Қытай банкімен байланыс күшейді
Таяуда АХҚО Басқарушысы Қайрат Келімбетов пен Қытай Банкінің атқарушы вице-президенті Жэнь Дэци Стратегиялық серіктестік туралы меморандумға қол қойды.
Осы меморандум аясында тараптар жоғары сапалы сервисті қамтамасыз ету және жаңа банк өнімдерін әзірлеу үшін трансшекаралық бизнесті одан әрі дамытудың мүмкіндіктерін бірлесіп зерделеуге ниетті.
– Қытай банкі – әлемдегі ең жетекші қаржы институттарының бірі, сондықтан оның тәжірибесі АХҚО-ны қаржы қызметтерінің өңірлік хабы ретінде қалыптастыру үшін өте маңызды. Банк серіктестерінің жаһандық желісі АХҚО-ға озық қаржы технологияларын тартуға көмектеседі, – деді Қ.Келімбетов.
Жақында «Астана» ХҚО алаңында Қытай мемлекеттік даму банкінің (ҚМДБ) ресми өкілдігінің ашылғанын айта кетейік. Бұл ҚМДБ-ның Орталық Азиядағы бірінші, ал әлемдегі жетінші өкілдігі екенін айта кетейік. Аталған банктің өкілдіктері бар Лондон, Мәскеу, Рио-де-Жанейро сынды шаһарлардың санатына енді Астана да қосылып отыр.
«Қара алтын» құны құлдырай бастады
Мұнай бағасы соңғы алты аптаның ішіндегі ең төменгі деңгейге құлдырап, Brent маркалы 1 баррель – 74,1 $-ға теңесті.
Сарапшылардың пайымдауынша, «қара алтын» құнының төмендеуіне ықпал еткен басты себептердің бірі – АҚШ пен Қытай арасындағы сауда текетірестерінің толастамауы. Инвесторлар ОПЕК-ке мүше- мемлекеттер министрлерінің отырысынан қандай нәтиже күтіп отырғаны да баға саясатына әсер етуде. Мұнай экспорттаушы мемлекеттердің министрлері осы отырыста көмірсутегін өндіру көлеміне қатысты шешім қабылдауға тиіс.
Дайындаған
Арнұр АСҚАР,
«Егемен Қазақстан»
