![Әрі балық аулады, әрі сыйақы алды](/article_photo/1530674914_article_b.jpeg)
Алдымен мамандар балық аулау ережелері мен қауіпсіздік шараларын түсіндірді. Жайық жағасына ертемен жиналған жас балықшылардың бәрі де олжадан үмітті. Алғашқы балық Досбол Әділовтің қармағына түсті. Жарыста қатысушылардың құр қармақ салып қарап отырмай, жемді дұрыс таңдауларына, ептіліктеріне, аулаған балықтарының көлемі мен салмағына да назар аударылды. Нәтижесінде, ең салмағы ауыр балық аулаған Жеткіншек Құлтеміров бірінші орынды жеңіп алып, 80 мың теңге көлеміндегі сыйақыға ие болды. Асылбек Сырымов екінші, Досбол Әділов үшінші жүлдені иеленді. Басқа да қатысушыларға арнайы сыйлықтар табысталды.
– Жаз мезгілінде жастардың бос уақыттарын тиімді пайдалануларына арнап түрлі шаралар жоспарладық, – дейді жарысты ұйымдастырушы, қалалық жастар ресурстық орталығының басшысы Серік Қадыров. – Жайық жағасында өскен жігіттердің балық аулауға деген қызығушылықтары жоғары. Осындай байқаулар арқылы жастар шыңдалады, жаңа достар табады, танымдарын кеңейтеді. Балықшылар байқауы алда тағы да болады.
Бақытгүл БАБАШ,
«Егемен Қазақстан»
АТЫРАУ